رسالة حب إلى أب السوايسة.. معلش اتحملنا

رسالة حب إلى أب السوايسة.. معلش اتحملنا

بقلم: وفاء عبد الغفار

إلى معالي اللواء أركان حرب / هاني رشاد محافظ السويس.. الأب الحنون

معلش اتحملنا..

أنا عارفة انك اتحملتنا كتير، وشيلت هموم سنين على عاتقك، هموم كانت متكومة من سنين طويلة.

بصراحة يا سيادة المحافظ، انت حسستنا ان شعب السويس ده كان يتيم ومصدق لقى أب حنون زيك، أب بيسمع، وأب بينزل الشارع، وأب بابه مفتوح للغلبان قبل القوي.

يا سيادة المحافظ، صفحتي كل يوم عليها مطالب كتير من الناس، الناس بتحملني الأمانة لتوصيلها لمعاليك من خلال صفحتي.

وأنا والله ما بطلب شيء لنفسي، أنا شايلة أمانة، أمانة اتحملتها منذ ترشحي لمجلس النواب، ورغم عدم الفوز، لكن حب السوايسة لسه في دمي، وهيفضل في دمي لآخر يوم في عمري، وعمري ما هتأخر عن خدمة بلدي وناسي.

أنا عارفة ان مطالبنا كتير، وطلباتنا مبتخلصش، بس هنعمل ايه؟ ما انت الأب ولازم تتحمل ولادك، ودول مش اتنين ولا عشرة، ده شعب السويس بحاله.

بارك الله فيك، وجعل كل خطوة بتخطيها في ميزان حسناتك، وأنا عارفة انك مش مستني مننا كلمة شكر، لانك منتظر أجرك من عند ربنا.

وكل الشكر والتقدير للناس المحترمة اللي في ضهرك
كل الشكر لمعالي الدكتور محمد علام نائب المحافظ، والأستاذ أحمد وزيري السكرتير العام، واللواء عارف البركاوي السكرتير العام المساعد، وكل رؤساء الأحياء وكل فريق العمل المعاون المخلص.

وفي النهاية، كل الشكر لفخامة الرئيس الهمام عبد الفتاح السيسي ، اللي حس بينا وبعتلنا بعد ربنا أب حنون زيك.

ربنا يعينكم ويقويكم علينا.

بنتكم وأختكم اللي شايلة أمانة السوايسة..
وفاء عبد الغفار

رسالة حب إلى أب السوايسة.. معلش اتحملنا