قليل البخت
عادل محمود
قليل البخت يلقي الوحدة ف اللمة
يلقي البعد ف الضمة
يحس بغربة بين الناس
يعيش ف الشمس 100 ضلمة
قليل البخت يوم ما حب ماتحبش
ويوم ماتحب ما حبش
نده علي حظه ف الدنيا
سنين وسنين ولا ردش
قليل البخت كان قلبي
فكل طريق يشوف عفريت
وبيأس بدري من ضعفي
وارجع اقول ياريتني ماجيت
وافوق من حيرتي القاني
واقف ف مكاني زي ما اكون
مولود بالحيرة رباني
عامل عاقل وانا مجنون
جنوني ف إني يوم صدقت
بإن الدنيا دي جنة
وإن الوقت مهما يطول
مسير القلب يتهني
يتهني ازاي ودي ساقية
ملهاش اخر ولا اول
هاتجري قد ما تجري
وترجع تاني م الأول
قليل البخت
📧 اشترك في النشرة البريدية
أهم الأخبار توصلك على بريدك.
💬 التعليقات (0)