العلم لا يقرأ عقلك .. بل يُعيد كتابته
كتبت : نعمة حسن
يبدأ الخوف الحقيقي
في اللحظة اللي العلم فيها يقرب من العقل البشري، مش بيقرب عشان “يفهمك”…
هو بيقرب عشان يقدر يسيطر عليك.
وأنا مش بقول كده كدراما…
أنا بقولها لأننا دلوقتي في زمن بقى فيه العقل نفسه ساحة اختبار،
الذاكرة مش ملكك بالكامل،
والتركيز مش قرارك لوحدك،
وحتى أفكارك… بقت قابلة إنها تتوجّه.
الفرق بين زمان ودلوقتي إن زمان كانوا يخوفوك بالسلاح.
دلوقتي بيخوفوك بـ العلم اللي بيقرأك.
الإنسان زمان كان بيقدر يخبّي اللي جواه،
دلوقتي أنت بتسيب آثارك في كل حاجة:
نبرة صوتك…
طريقة كتابتك…
سرعة ردّك…
نوع الصور اللي بتقف عندها…
اللحظة اللي بتتوتر فيها…
حتى نظرة عينك لو في كاميرا.
والعلم مش بيجمع ده عشان التسلية.
بيجمعه عشان يعرف سؤال واحد أخطر من أي سؤال:
إزاي نخليك تختار اللي إحنا عايزينه… وأنت فاكر إنك اخترته بإرادتك؟
وهنا بيبدأ الجزء المرعب.
لأن أقسى أنواع السيطرة مش اللي بتشدك بالقوة،
أقسى أنواع السيطرة هي اللي تخليك تتحرك لوحدك…
وتفتكر إنك حر.
تخيل حاجة بسيطة:
لو في لحظة قدرت التكنولوجيا تعرف إنت هتغضب إمتى قبل ما تغضب،
وتعرف إنت هتضع إمتى قبل ما تضع،
وتعرف إنتي هتشتاق لمين قبل ما تعترف…
يبقى إحنا قدام اختراع مش بيقيسك…
ده بيعيد تشكيلك.
العقل البشري مش مجرد جهاز استقبال أفكار.
العقل البشري هو الحصن الأخير.
ومشكلة الإنسان إنه طول عمره كان فاكر إن السيطرة بتبدأ من الخارج:
من السجن
من السلطة
من الخوف
من الفقر
لكن الحقيقة إن السيطرة لما توصل لمرحلة أعلى…
بتبدأ من الداخل:
من تكرار الفكرة
من تحوير المعنى
من خلق مشاعر مش بتاعتك
من صُنع رغبة أنت فاكرها رغبتك
وده بقى مش تخمين… دي آلية شغّالة حوالينا كل يوم.
إعلانات بتقنعك إنك ناقص
ترند بيقنعك إنك متأخر
محتوى بيقنعك إنك قليل
نظام بيقنعك إن المقاومة عبث
والأخطر؟
إنك مع الوقت بتتعود.
بتتعود إنك تكون مراقَب… بس مش حاسس.
بتتعود إنك تكون متوجَّه… بس مقتنع.
بتتعود إنك تكون مقود… بس متخيّل إنك قائد.
وعشان كده أنا بقولها بوضوح:
حين يقترب العلم من العقل البشري… يبدأ الخوف الحقيقي.
مش لأن العلم شرير،
لكن لأن الإنسان اللي بيستخدمه مش دايمًا نضيف.
ولو العقل اتسلم…
كل شيء بعده يسقط بسهولة.
السؤال مش: “هل العلم هيقدر يوصل للعقل؟”
السؤال الحقيقي هو:
هل الإنسان هيحمي عقله… قبل ما العلم يسبق وعيه؟
وهل احنا جاهزين فعلا للمواجهة.. وهل نقدر نطور عقولنا بقدر ما نطور الآلات.
اتمنى ..
مع تحياتي ..
