بتاريخ 22/9/2023
الشاعر المصري أحمد إبراهيم النجار
يكتب ( لهيب الحب )
انا مش هكون
واحد على هامش كتاب
آخر سطور
تكتبها إيدك فى الجواب
أنا مش هبات
ساكنه الدموع عيني أنا
ولا يوم هسيب
قلبي يدوق طعم العذاب
انا كنت باب
لأحلامك أنا وقت اللجوء
وأحضن عنيكي النعسانين
وقت الغروب
وأسقيكي من شهدي الحنين
بعد الغياب
ده أنا قلبي شاب
والبعد داء
فيكي وعايش بين ساعات
ويدق قلبي بنبض ضوء
وقت الغروب
ولا يوم فى حُبك
قلبي تاب
رغم الظروف رغم الأهات
وكل مرة بتسلُكي
نفس الطريق
والقلب بيزيد إشتعال
بركان حريق
وألوم عيونك ترجعي
واحد بريئ
وقلبي يرجع تاني
ينسى كل شئ
وأدور فى فُلكك
تاني و ف نفس الطريق
وأغرق فى بحر عنيكي
وأصبح شهيد
حرام عليكي يا أملي البعيد
بعدت حدود
وف قلبي صوت
عالي بيصرخ م الغياب
أنا مش هكون
واحد على هامش كتاب
اخر سطور
تكتبها إيدك فى الجواب
انا قلبي شايب م الغياب
أصبح ضعيف
طعم الغياب ملهوش دوا
لما الهوى أصبح شديد
زايد على كل الحدود
ولا له مثيل
بتلومي قلبى إنه زايد بإهتمام ؟
طب إيه هقول ؟
صعب إني أوصف بالكلام
ده الحب إحساس مش كلام
تحكيه عيون
كل المشاعر والغرام
والروح تبوح بكل شئ
الحب مش حبة حروف
بين السطور
الحب ده زي الزهور
وبدون ربيع بستان يبور
يصبح هشيم
طب قولي مين حبك
و عاش فيكي وطن
او حتى عازف ع الوتر
ردد نشيدك
أو داب فى ننك الخضار
او حتى زار جوهر طريقك
مين غيري مين هيكون حبيبك؟
او حتى كان دارس كتابك
غيري أنا إحساس غريب
فى البعد نار والشوق دمار
ريختر فى عمقي
ب10 زلزالي الشديد
وأعلى درجة فى قلبي العنيد
أعلنت حبك
ع الخرايط والرمال
أعلنت إنك
وطني وحبي الوحيد
أعلنت إني
فى هواكي الشهيد
برغم إنك عن منالي
شئ بعيد
صعب إنى انول
لمسة إيديكي البردانين
رغم المواني والحدود
رغم الجبال رغم السدود
رغم الموانع والظروف
الحب مش حبة حروف
تتقال على وجهة
القصيدة وتتكتب
الحب إحساس له جمال
والقلب كاتب بالمداد
وروحي بعتالك سلام
مش بالكلام
يا وطني يا حبي الوحيد
والحب أعلى درجات الإهتمام
مش بالحروف أو بالكلام
بقلم الشاعر المصري أحمد إبراهيم النجار
