مسافر
—————
شعر/ عماد عزيز
–————–
على اسمك
يا بلد الحب غنينا
على اسمك
خلّفنا وسمّينا
ودندنّا غناوينا
يا شايلة الكل فى كفوفك
لا هنفارقك
ولا انتى فى يوم تفارقينا
انا مسافر
وحالف تانى لارجعلك
عشان دمعك
ما يترغرغش فى عنينا
على صوتك سمعنا أدان
وشماسّك بصوته الحلو يشجينا
أبونا فى كفه قرآنك
وشيخنا فى ايده انجيلك
هلال وصليب فى أحضانك
واوتارك على الحانها غنينا
على عينى
هفارق ارضك الغاليه
وهرجعلك
واقول فى الغربة دى بلدى
هقول للكل دى أمى
دانا منها
وهى بدمها منّى
ملامحها على وشى
ولونها الوردى على خدى
ومن نيلها بتروينا
على لحنك يا مصر الغالية غنينا
فى ليلك شفنا عشاقنا
بيشتاقوا
ويتعاتبوا ويتصافوا
وأوجاعهم تبكّينا
على نيلك
أخونا الشاعر الراقى
كتب أشعار بتشجينا
على صوتك
ينام الليل
وفجرك تانى يصحينا
يقوم فلاح على غيطه
وواخد سُرّتّه فى ايده
بجبنة قريش وبتاوة
وكباية وتفة شاى
وركّاية تدفّينا
على قمرك
يبات مظلوم
ودمعُه المر على خده
يناجى ويشتكى لربه
يقوم منصور ويدعينا
على رسمك
يا أم الدنيا لونّنا
على كفوفنا تلات الوان
أحمر بلون دم اللى راحوا
استشهدوا فيكى
وابيض بلون الحب
جنب سمارُه فى عنيكى
واسود بلون أرضك
بتطرح خير بيغنينا
أنا مسافر
لكن من تانى هرجعلك
أنا مسافر
وعز عليا أولادى
وأولادك
لكن من تانى هرجعلك
وهكتبلك
عشانك أجمل الاشعار
وهكتب اسمك الغالى
بلون دمى اللى فى عروقى
واقول لو مُت فى الغربة***
أشعار *. عماد عزيز
مسافر
