دونوا عني الكلام وافهموا
معنى السلام
السلام مش رمز أو صورة
حمام
السلام آمن وتسامح مش
مسكن ع الدوام
مش نتبطب ع اللي سارق
أو ع الجبان
ويبقى بينا الحق نام
السلام مش بيان نشجب نندد
لما نلقى الظلم عام
فوق بحور الإنسانية
والحق ضاع وسط الظلام
ده مش سلام ده اسمه ضعف
واحنا بنذوق كلام
لما الطفولة تنتهك ويتقتل
بينا الرضيع ويا الغلام
ده مش سلام لما الحراير
عرضهم ينتهك
واحنا حاطين فوق ضميرنا
ميت لجام
السلام لما اللي واخد عهد
منك بالآمان
جوه بيته يعرف ينام
مش تبقى سارق منه أرضه
ومستبيح حتى عرضه
وطرده نايم في الخيام
وجاي تقول ده سلام
طب سلام
ع اللي شاهد واللي سارق
ع الدوام
واللي مسروق منه حقه
وسط الزحام
واللي سارق منه حقه
مكبله بكلمة سلام
بقلم الشاعر فهمى محمود حجازى
