أجازة جمع القطن زمان في أواخر السبعينات كنا في ابتدائي شهر أكتوبر كانت الدراسة بتبدأ المريلة والشنطة من نفس اللون كان المعروف أنه قماش (تيل نادية ) كنا بننطقها كده وبعدين عرفنا أن القماش ده مستورد من تايلاند خارجين بفرحة وسعادة عشان عودة الدراسة مشناقين والله للصحبة واللعب في الفسحة وتحية العلم بصوت حضرة الناظر (ابتدي ) ثني مد افرد دراعك واطويه قبل ما نشوف زيارة معالي الوزير في فيلم طباخ الرئيس والناظر بيقول ياللا ياولاد نشيد معالي الوزير
العيال في صوت واحد
العنب العنب العنب ضياء الميرغني الناظر
مش ده يا ولاد
معلش نسيوا أركب الحنطور واتحنطر
احنا بقا على أيامنا تحية العلم أزهر أزهر أزهر تحيا جمهورية مصر العربية ٣ مرات أسبوع والتاني أجازة جمع القطن نروح الغيطان نشوف الذهب الأبيض على عوده وزهرات القطن تتفتح كالورد الأبيض يتدلى من بين براعمها جلباب واسع مش مقاسي ولا مقاس حد من رفاق الغيط يرفع الجلباب قليلا ويتم ربط الجلباب على هيئة حزام ليتدلى نصف الجلباب لنبدأ بجمع القطن والتقاط زهراته الناصعة البياض لوضعها من فتحة الصدر ( العِبّ) ويتم التسابق من يملأ عبه قبل الآخر لنجري لتفريغ الحَمل والحِمل في نفس الوقت عطشان عطشان جوعان جوعان طفل في الثامنة والتاسعة من عمره يخرج في السادسة صباحا على الريق سندويتش طعمية سخنة في رغيف من بتاع زمان يفتح النفس و يشبع وجنبه كيس طرشي
روحوا املوا القُلل من (الطرمبة ) هما قلتين روحنا نملاهم واحدة وقعت انكسرت وهي فاضية والتانية بعد ما اتملت وقعت انكسرت ورايحين والخوف يقتلنا من العقاب المنتظر هانشرب ف ايه دلوقت ياولاد ال …….. ويتم نزع عود قطن من اللي فرغت من الزهرات وهاتك ياضرب وبعد االظهر نجلس للاستراحة والغدا جبنة قديمة ومش وسريس وجعضيض اسمه كده ونكمل المسيرة بعد الغدا لتقترب الشمس من الغروب وقد انتهينا من جمع المحصول ويتم تعبئة القطن في أكياس من (الخيش ) لتذهب إلى محلج القطن ليبدأ دولاب العمل فصل القطن عن البذرة حافظوا ع البذرة ياولاد دي هاتتزرع تاني وعند قبض الثمن يتم مكافأة كل من اشترك في جني القطن وشراء دجاجة كاملة أو كيلو لحم مع كرنبتين وحلة محشي تفتح النفس
ونرجع للمدرسة وكلنا نشاط لنقوم بتحية العلم أزهر أزهر أزهر تحيا جمهورية مصر العربية
