أمم أفريقيا تبدأ.. هل يستطيع المنتخب المصري مواكبة التطورات
مصطفى بكر
جريدة موطني
مع افتتاح بطولة كأس الأمم الأفريقية ترجع الكورة في أفريقيا كلها للواجهة وترجع معاها أحلام جماهير كبيرة يمكن أكترهم الجماهير المصرية.
المنتخب المصري داخل البطولة وهو واحد من الفرق المرشحة للوصول للأدوار النهائية وده طبيعي بحكم التاريخ والأسماء الموجودة لكن في نفس الوقت محدش يقدر ينكر إن حال الكورة المصرية نفسها بقى محتاج وقفة.
الجمهور عايش إحساس متناقض أمل في المنتخب الوطني وقلق من واقع كروي محلي مليان مشاكل من تراجع مستوى الدوري لقلة المواهب الجديدة لغياب التخطيط الواضح.
افتتاح البطولة وضح قد إيه الكورة الأفريقية بتتغير وتتطور تنظيما واستثمارا ومستوى وده يخلي السؤال منطقي هل الكورة المصرية ماشية في نفس الطريق ولا معتمدة بس على تاريخها وموهبة لاعبيها؟
المنتخب عنده عناصر قادرة تنافس والدعم الجماهيري دايمًا موجود خصوصا وقت الشدة لكن النجاح الحقيقي عمره ما يكون بطولة واحدة أو مباراة كبيرة النجاح الحقيقي محتاج شغل من تحت لفوق.
الكورة المصرية محتاجة مشروع مش حلول مؤقتة محتاجة إعادة نظر في القاعدة في المسابقات وفي فكرة الاحتراف نفسها، بدل ما نفضل نعلق كل مرة آمالنا على بطولة واحدة.
ومع بداية البطولة وبين فرحة الافتتاح وانتظار أول ماتش يفضل السؤال موجود هل نكتفي بالأمل في المنتخب ولا نستغل الفرصة ونراجع حال كورتنا بجد؟
أمم أفريقيا تبدأ.. هل يستطيع المنتخب المصري مواكبة التطورات
