أول حب مات
عادل محمود
أنا اللى واقفه كده منصوبة
وحزني الجوانى يوماتى يدبحنى
و رافضة أبان للعيون مغلوبة
و لا حتى عودى الأخضر محنى
و لما تكون الضحكة مطلوبة
بأضحكها ….
و عارفة الدمع مسامحنى
أنا البنت اللى مات أبوها
بعد ما جرب مرة يضفر شعرها
و أنا اللي جريت بشقاوة و براءة
تحت مخدته و خبت سرها
أنا البنت اللى عرفت يعنى إيه ؟
تحت الشمس تتكشف راسها
و ف عز البرد يتعرى ضهرها
أنا البنت
اللى مات أبوها و سابلها
طعم الحنين
ملح دايب في سنين عمرها
خلاها عنيدة
مع الحياة وف عندها
كل لحظة فيها تجدد عهدها
إن إيمانها و صبرها
أكبر كتير يا بابا من قهرها
مش زعلانة من يوم راح
و لا خايفة من الآتى
بس كان نفسى تحضنى
ف لحظة النجاح
زي ما سهرت حاضنة
كتبى و كراساتى
و أشكيلك تعب وهموم وجراح
و تفاصيل بتخنقنى يوماتى
و تطبطب عليا و تضحك
و تقولى
أصلك كبرتى
و بقيتى جميلة يا مولاتى
و بحكمة تنصحنى و تخرجنى
من يأسى و إحباطاتى
و كان نفسى أحكيلك عن حب
ها يصادفنى يوم فى حياتى
و أقولك قلبى دق
و شايفه صورتك فيه
و شايفة كل أمنياتى
كان نفسى تفضل معايا
أكتر و أكتر
تحس بيا لما أسهر
ترن عليا لما أتاخر
تشخط فيا لما أغلط
و ف لحظة زعلك يتبخر
و أفضل طفلة فى عينيك
تلعب معايا
و أستنى هدايا
و خوفك و حبك
حرس يمشوا ورايا
بس الحكاية
مش بالتمنى و الإفتراض
و أدينى سلمت راضية
زي ما ربنا أراد
و هأفضل عايشه معاك
و إنت عايش معايا
و لو كانت بس صورة
ذكرياتك فيها باقيالى
هأخبيها تحت جلدى
و أجريها جوة دمى
و أوريها ف يوم لعيالى
أقولهم
دى أطيب عيون
عاشت بالعطف بصالى
و دى ضحكة فضلت
زى السما صافيالى
و ده قلب ياما خبانى
من ريح عاتية جيالى
و ده أول حب مات ليا
و قد ايه كان حب غالى
أول حب مات
