الأبراج في زمن الإحراج تأليف طه هيكل برجك ايه؟ ١- أنا برج (الميزان ) بس من غير كفة الكفة مالت مع بختها وكاشفة راسها بتبكي وتنعي حظها لو الميزان في يوم اتعدل بالكفتين هايبقى يوم نادي ونهار زين ٢- وأنت برجك ايه ؟ أنا برج( الدلو ) طيب مليان ياعم الدلو ولا فاضي رايح تخطب ستك ليه أنت فين وهي فين ؟ وأنت مالك ياعم الحِشَري ده أنا راضي وأبوها راضي مالك ومالنا بقى ياسيدنا القاضي ٣- وأنت برجك ايه ؟ أنا برج( الحمل ) وقد ناء الجمل بما حمل الحمل تقيل والباقي من العمر قليل ياترى هتلحق تحقق حلمك يوم ؟ طيب قولي ازاي و فين الدليل ؟ ٤-وأنت برجك ايه ؟ أنا برج (التور ) يابختك ياتور داير ف الساقية مش حاسس باللي حواليك مغميين عينك وأنت داير لا بتشتكي ولا بتقول الآه ولحد امتى ياتور هاتفضل حاير والساقية تدور على صحتك وأنت عمرك ماتعترض ولا تهرب ولا تقول كفاية خساير ٥-وأنت ياعم برجك ايه ؟ أنا برج( السرطان ) متزعلش ياعم ربنا ياخد بيدك وترجع سليم معافى لا المرض بيدوم ولا الصحة لا المال بيبقى ولا الفقر الفقر مش عيب العيب إنك تسخط على قسمتك ونصيبك ٦-وأنت ياعم برجك ايه ؟ أنا (الأسد ) واسمي الليث وبيدلعوني بيقولوا لي أسامة وساعات يقولوا لي ياغضنفر وشيخ محضر ياشيخ محضر واللي عليه عفريت يحضر هنصرفه بإذن الله ولا يهمك يا أسد خليك شجاع متبقاش للكلام بياع ولا تحس إنك من سقط المتاع ٧- وأنت ياستي برجك ايه ؟ أنا (الجوزاء ) مليش مثيل في الوصف هيفاء غيداء هبلاء زكماء عطساء رفيعة القوام والقد مياس بس مليش ف طبخ القلقاس وأنا مبشبهشي حد ومن قدم السبت هاينسى إن فيه يوم اسمه الحد ٨- وانت ياللي مستخبي ولابد لنا في الذرة برجك ايه أنا برج( الجدي ) وفرحان أوي ليه كده جدي ولا مش جدي عادي المهم تشوف الجدية اللي تناسبك عشان تبقوا جديان لايقين على بعض ٩- وأنت ياعم يا مستعد في وترك ومتأهب عشان تنطلق برجك ايه ؟ أنا ( القوس ) وفين أخوك ؟ أخويا مين ؟ القوس التاني مش مفروض تكون واقف بين قوسين كده هتبرد الشتا قرب ياعم القوس شوف لك قوس تاني معاك يشد أزرك ١٠- وانت ياخال برجك ايه؟ أنا برج( العقرب ) وأنت عارفني لما بلدغ بتكون لدغتي والقبر تحس إنك متكهرب ماهو أنا أصلي عقرب وصفتي معقرب متقدرش تقاوح معايا وإلا هي لدغة وهنسيك اسمك ١١- وأنت ياهانم برجك ايه أنا برج (العذراء ) ومحدش راضي يتقدم ولا يدق علينا باب تفتكر ياعم حظي حلو ولا هباب شوف لي الأتر وفك العكوسات وأنا أجيب لك شاورما وكباب ١٢ - وأنت يا آخرة صبري برجك ايه ؟ أنا برج( الحوت ) وها أقف لكو ع الناصية ومحدش هايفوت الشارع ده ملكي وواخده وضع يد وفرض أتاوة ولو مش عاجبك اضرب راسك ف الحيطة واوعى تفكر إنك تقدر ع الحوت ده أنا ممكن أبلعك وأقرقش عضمك وأسلخ جلدك وأقلع لك ضوافرك ومش هاتقدر تصرخ ولا تقول غيتوني ياخلق غيتوني ياهووووووه طه هيكل الأبراج في زمن الإحراج
