الدولار وسنينه
بقلمى محمد عنانى
الدولار وسنينه
لعنه على الدولار
ملعون أبو سنينه
دا العقل منه طار
ولا حالهُ فاهمينه
دعوه عليه بدمار
مع شل شرايينه
شاغلنا ليل ونهار
فى سعره حاسبينه
حَوِل حياتنا مرار
وجحيم وعايشينه
مابين لهيب أسعار
كاس مر شاربينه
ومابين جشع تجار
بلا رحمه شايفينه
حتى الجنيه إنهار
فى قيمته راح فينه
ولا وصفه للشطار
يوم نافعه له تعينه
يرجع يقف زِنهار
شامخ عالى جبينه
ودا اللى كان جبار
كان سبع عارفينه
منه اشترينا خضار
مع فاكهه فاكرينه
والفكه فيها نحتار
بيها ياما شاريينه
دلوقتى ليه الدولار
طايح ما قادرينه
صبح قوى ومكار
فى جنيهنا بيهينه
ويزيد عليه الغدار
خلاص ما طايقينه
مافيش جديد أفكار
من ناس متابعينه
من صفوة الأخيار
ومن اللى دارسينه
بوصفه بيها أسرار
فيها وقف تمكينه
نرتاح من الأشرار
ومن اللى عاشقينه
