حين يبعتلك الزمن إشارة ما تفهمهاش غير لما تتوجع
بقلم/نشأت البسيوني
في لحظة من اللحظات وإنت قاعد لوحدك بتحاول تهرب من زحمة اليوم وتحط راسك على الحيطه اللي حافظه أسرارك تلاقي جواك إشارات كتير عدت عليك قبل كده بس ما فهمتهاش ساعتها يمكن كنت مشغول يمكن كنت بتحارب يمكن كنت بتضحك على نفسك وتقول كل حاجه هتتظبط بس الحقيقة إن الزمن كان بيبعتلك علامات وانت كنت بتطنشها علشان قلبك كان أضعف من إنه يواجه
وبعد فترة بتكتشف إن الناس اللي كنت شايفهم سند طلعوا تقيلين على روحك أكتر من الهم وإن الأبواب اللي كنت ماسك فيها بإيدك وسنانك كانت أصلاً مش معمولة ليك وإن الطرق اللي كنت بتجري وراها بكل قوتك كانت نهايتها وجع مكتوب عليك تشوفه علشان تفهم إن السلام مش في الجري السلام في اللي تمشي نحوه وإنت مرتاح وتفوق فجأة على صدمة تكسرك في الأول بس تصلحك في
الآخر تفوق على حقيقة إنك كنت بتدي من قلبك لناس ماعرفوش قيمة عطاياك وإنك تحملت فوق طاقتك لأنك كنت خايف تخسر حد وفي الآخر خسرت نفسك قبل أي حد وتفوق على لحظة تدرك فيها إن ربنا كان شايلك من حاجات لو كانت فضلت معاك كانت هتضيعك ضياع ماكانش ليه رجوع ومع الأيام تفهم إن الإشارات اللي طنشتها كانت بتقولك أهرب من اللي بيستهلكك خليك مع اللي
يحافظ عليك بلاش تقف قدام باب مقفول بس لأنك تعودت عليه بلاش تفضل سايب حد يوجعك بس علشان بتحبه لأن اللي يحب مايوجعش واللي يوجع ما يستحقش وتفهم برضه إن الأيام اللي عديت فيها مبسوط كانت هدية وإن الأيام اللي بكيت فيها كانت درس وإن المسافات اللي بينك وبين ناس كتير كانت رحمة مش عقاب وإنك كنت محتاج تبعد علشان تفهم إن قربك غلط من البداية
وفي آخر الطريق تعرف إن الإشارة اللي كنت مش فاهمها كانت بتقولك راجع نفسك واهدأ وانهض ببطء بس انهض وامشِ في الاتجاه اللي فيه كرامتك قبل قلبك وراحتك قبل ناسك وسلامك قبل كل الدنيا لأن مفيش حد هيشيلك أد ما انت ممكن تشيل نفسك
وهتعرف إن الزمن عمره ما ظلمك الزمن كان بيعلمك وإن الدرس اللي بيتأخر دايما بيكون أهم من اللي ييجي بدري وإن الوجع مهما
كان تقيل هو اللي بيعيد ترتيبك ويخليك نسخة أنضج وأوعى وأقوى من أي يوم فات عليك
