متابعة / محمد مختار
السبت 2026/3/21
إيران لأول مرة على الإطلاق تضرب صواريخ عابرة للقارات ICBMs على قاعدة دييجو جارسيا البريطانية اللي في المحيط الهندي على بعد اكتر من 4000 كيلومتر كاملين الخبر ده نزل زي الصاعقة على الأوروبيين فعليًا وبدون مبالغة والإعلام الغربي كله بيتكلم عليه دلوقتي.. والسب ان إحنا هنا مش بنتكلم عن قاعدة أمريكية عادية في الشرق الأوسط دي قاعدة بريطانية أمريكية مشتركة موجودة في حتة منعزلة في قلب المحيط الهندي يعني بعيد جدا عن الشرق الأوسط وكنا فاكرينها خارج نطاق الصراع أساسًا
الصاروخين دول بحسب تصريحات المسؤولين الأمريكان في تقرير لصحيفة الوول ستريت جورنال، تم اطلاقهم بشكل مباشر على القاعدة وواحد منهم حصل فيه عطل فني في الجو ووقع، والتاني حاولت سفينة حربية أمريكية تصده ولحد دلوقتي مفيش تأكيد كامل ما إذا كان الاعتراض نجح ولا الصاروخ وصل لهدفه بالفعل بس المشكلة مش هنا خالص الموضوع أكبر من كده بكتيرليه
عشان احنا كده بنكتشف لأول مرة ان صواريخ إيران مداها مش منحصر في الشرق الأوسط بس!
إيران كشفت إن عندها صواريخ بتطول ضعف المسافة دي يعني ببساطة إيران دلوقتي عندها القدرة تضرب أهداف في قلب بريطانيا وفرنسا
وزير خارجية إيران عباس عراقجي كلن طلع قبل كده في تصريحات وقال إنهم حصروا مدى صواريخهم عند 2000 كم والكلام ده كانت بتدعمه بالفعل التقارير العسكرية والاستخباراتية الإسرائيلية بس اللي حصل ده بيقول إن الكلام ده كان تنويم مغناطيسي للغرب وإن التهديد الإيراني دلوقتي بقى أعلى بكتير وبيمس أوروبا كلها بشكل مباشر!
والفكرة بقى إن الحدث ده مش صدفة خالص الخبر ده جه بعد ما بريطانيا وافقت لأمريكا إنها تستخدم القاعدة دي لضرب مواقع إيرانية بتهدد مضيق هرمز وبالفعل بعتت خبراء بريطانيين للمساعدة وفي كلام انها كانت ناوية تبعت حاملة طائرات كمان وعلطول بعدها بمفيش كام ساعة يظهر الخبر ده فجأة عشان ينزل زي الصاعقة على دماغ أوروبا كلها
أنت متخيل لو إيران قدرت تقصف قلب المدن الأوروبية متخيل انها مثلًا تحمل اليورانيوم المخصب اللي عندها على رؤوس حربية وتعمل رؤوس قذرة Dirty Warheads وتضربها على لندن أو باريس دي مشكلة كبيرة جدًا بالنسبالهم دلوقتي
طب هي إيران وصلت للتكنولوجيا دي ازاي الله أعلم في تحليلات بتقول ان التكنولوجيا دي مش إيران بس اللي وراها، وإن ممكن جدًا تكون روسيا والصين هما اللي ورا التطور المرعب ده.. وخصوصًا روسيا اللي ممكن تكون إدت التقنيات دي للإيرانيين كجزء من التصعيد اللي شغال دلوقتي بين روسيا وإسرائيل، واللي حكيتلك عليه في المقالات اول امبارح وبردو في احتمال تاني وهو ان دي عملية علم مزيف جديدة False Flag من أمريكا أو اسرائيل عشان يدفعوا بريطانيا والناتو لدخول الحرب بشكل مباشر ضد إيران لتدمير قدارتها الصاروخية عشان متشكلش تهديد على أوروبا والمشكلة ان ده جاي في نفس الوقت اللي الإيرانيين بيدعوا فيه المسلمين للتحالف والمرشد الإيراني مجتبى خامنئي في كلمته النهارده دعا لتشكيل ناتو إسلامي يحمي المنطقة كلها ويطرد الأمريكان من الشرق الأوسط!
إحنا كده داخلين على مرحلة الحرب فيها مبقتش محصورة في حدودها التقليدية والمواجهة وسعت جغرافياً بشكل مكنش حد يتخيله
إيران لسه مخبية مفاجآت كتير شكلها والموضوع مفاجأة كبيرة فعلًا
