تعمل ايه مع البجح ؟؟ ..

بقلم قليوبيه. بقلم سوزان عادل تعمل ايه مع البجح ؟؟ ..

فيه مستوي بيوصل ليه “للاسف الشديد” شوية من الناس اسمه البجاحة !!
و علي رأي المثل “يخاف ما يختشيش ” ، لا حيا و لا أدب و لا ذوق !!

تلاقيه مسبب لك اذي و دايس علي كرامتك و متكلم عليك بالردي في ضهرك ، و اول ما يشوفك -بكل بجاحة- يطلب منك خدمة و لا كأنه عملك حاجة ، و كأنه بيستفزك و يقولك “ح اضايقك بالقوي و لازم تخدمني بالقوي” !!

او تكون لسه كارمه و مقدم له كل اللي طلبه ، و مفيش ساعة و تلاقيه “زي القطط ياكل و ينكر” ، و لا يعمل اعتبار لحبك و احسانك ليه ، و يعمل نفسه مش عارفك و يرفض يقف جنبك ..

موديل إنساني موجود بوفرة ، و اذاه مضاعف ، انه بيحطك بين مطرقة المحبة و سندان الذل و الاستغلال..

تحبه ، و تديله ، و تقبل ذله ليك ، و لا ترفض استغلاله و ضميرك يتعبك انك لا تحسن له و هو مؤذي ؟؟

صراع الضمير الحساس ده تحسمه بالحكمة و النعمة ، حسب الموقف ..

ليك انك تخدمه مرة ، و بعدين تعتذر بأدب و ذكاء ، يمكن يتكسف، و تقوله انها مرة و مش ح تقدر تكررها تاني ..

و ليك انك تعتذر من الاول بالذات لو الطلب لا يراعي خصوصياتك او امكانياتك و تقول أن الموضوع مش مناسبك ..

و ليك انك تواجهه “بحسم مؤدب” ، و تكشفه قدام نفسه و تعرفه انك فاهمه ، و ترفض اسلوبه ، و تفكره باللي عمله، علشان يفوق و يعرف ما يعملش كده معاك او مع حد تاني (ده لو فهم اصلا للاسف !!)

المهم في كل الأحوال ان حبك للكل يكمل ..
و كالعادة لو ما لقيتش مع “البجح” حلول ، حطه في مكانه الطبيعي : التجنب الحكيم و الاستغناء السليم ، و ده اسمه “الحب السليم” ..