حين يفهم الإنسان معنى أن يبدأ من الصفر
بقلم/نشأت البسيوني
حين يفهم الانسان معنى ان يبدأ من الصفر يدرك ان البداية مش ضعف ولا هزيمة وان الرجوع لاصل الخطوات مش سقوط بالعكس الرجوع هو لحظة وعي لحظة يعرف فيها انه كان ماشي في طريق مليان علامات تحذير لكنه كان مصر يسمع صوته الداخلي اللي بيقول يمكن بكرة يتغير يمكن اللي موجع النهاردة يبقى داوى بكرة ويمكن اللي ماحصلش يحصل ولما يجي اليوم اللي يشوف فيه
الحقيقة بعينه مش بأمله يفهم ان الصفر مش مكان فارغ الصفر صفحة بيضا الصفر مساحة ربنا بيديها للروح عشان تعيد ترتيب نفسها من غير ضغوط ومن غير اللي كان شدها لتحت ومع كل بداية جديدة نلاقي ان اللي كنا خايفين نخسره هو اللي كان لازم يمشي وان الناس اللي كانت واخدة جزء من طاقتنا من غير ما ترده كانوا عبء وان العلاقات اللي كنا بنحافظ عليها بالعافية كانت
مجرد عادة مش حب وان البدايات اللي بنكرهها هي نفسها اللي بتطلعنا من الفوضى اللي اتعودنا عليها من سنين واللي كانت بتستهلك فينا العمر نقطة نقطة وحين نتعمق اكتر نلاقي ان البداية من الصفر مش قرار سهل بداية من الصفر محتاجة قوة قلب يتخلى عن اللي تعلق بيه وقلب يفك نفسه من أوهام بناها وقلب يواجه نفسه قبل ما يواجه الناس يفهم عيوبه ويتصالح مع نواقصه
ويشوف الحقيقة من غير مكياج ومن غير محاولة يثبت انه صح حتى لو كان غلط ولما يعمل كده يعرف ان الصفر مش مخيف الصفر صادق ومع الوقت نلاقي ان الصفر مكان نظيف مكان نقدر فيه نعيد حساباتنا نرسم طريق جديد نختار ناس شبهنا ناس وجودهم راحة مش دوشة ناس كلامهم سند مش وجع ناس عيونهم صدق مش اختبار ولما نبدأ نكبر من الصفر نكبر ببطء بس بثبات نكبر من غير
ما نستنى تصفيق ولا انتظار نعرف ان كل خطوة صغيرة اقوى من الف خطوة مزيفة كنا بناخدها عشان نرضي حد او نثبت نفسنا قدام حد ما يستاهلش ولما نبص لورا بعد شهور او سنين هنلاقي ان الصفر ماكانش خسارة الصفر كان نقطة ميلاد جديدة نقطة خلتنا نفهم ان رحيل ناس ماكناش متخيلين نعيش من غيرهم كان رحمة وخسارة فرص كنا شايفينها ضلمة كانت نجاة وان الباب اللي اتقفل
غصب عننا كان اكبر نعمة ربنا حطها في طريقنا علشان نخرج من سكة ماكانتش لينا من الاساس وفي اخر الطريق نعرف ان الصفر مش رقم الصفر حالة الصفر بداية الصفر شجاعة واللي يبدأ من الصفر عمره ما يرجع زي ما كان عمره يرجع انضج واقوى واهدأ واععمق يختار بعقل يحب بروحه يعيش بسلام ويعرف في قرارة نفسه ان اللي جاي اعظم لانه جاي من نقطة نقية ما فيهاش كسر ولا خوف فيها اعادة ميلاد لانسان اتولد من نفسه من جديد
حين يفهم الإنسان معنى أن يبدأ من الصفر
