حين ينفد صبر القلب دون أن يصرخ
بقلم/نشأت البسيوني
في لحظة ما من العمر ييجي وقت القلب يبطل يشرح ويبطل يلوم ويبطل حتى يتوقع من حد أي حاجة يبطل ينتظر اعتذار ويبطل يدور على تفسير ويبطل يمد إيده للناس اللي عمرهم ما حاولوا يفهموا وجعه ويكتشف إنه بقى المسافر اللي تعب من الطريق لكنه مكمل لأنه ما يعرفش غير إنه يكمل القلب ساعات ما بيتكسرش بضربة واحدة لكن بيتفتت حتة حتة من الناس اللي كان
شايفهم أمان وضهر وسند وهما في الحقيقة كانوا اختبار صعب مش كل القلوب اللي ضحكت قدامك كانت فرحانه ومش كل الوجوه اللي بان عليها القوة كانت قوية في ناس واقفة على رجليها من بره بس من جواها منهارة لدرجة لو خدت نفس زيادة ممكن تقع في ناس طول عمرها بتتحامل على نفسها وبتخبي تعبها وبتحافظ على اللي حواليها كأنها مسؤولة عن راحة العالم كله حتى وهي
موجوعة حتى وهي منهكة حتى وهي محتاجة حضن مش كلام وكتف مش نصيحة ناس بتدي فوق طاقتها وتتحمل فوق قدرتها وتسامح فوق حدودها وتكمل رغم إن اللي قدامها مش حاسس ولا مقدر ولا حتى واخد باله إن اللي واقف قدامه ده إنسان مش حجر وفي نقطة ما يأتي الوقت اللي ينفد فيه صبر القلب بس من غير ما يصرخ ولا يعاتب ولا يشتكي يسكت بس سكوته ده أكبر ألف مرة
من أي كلام ويبعد بس بعده ده أوضح من ألف سبب ويسيب اللي وجعه من غير ما يطلب منهم يفهموه لأن اللي ما فهمش من البداية مش هيفهم في النهاية القلب لما يتعب بجد ما بيكرهوش حد لكنه بيزهق من الوجع وبيزهق من الوعود وبيزهق من نفس السيناريو اللي بيتكرر كل مرة وبيوصل لمرحلة مش محتاج فيها يثبت إنه طيب ولا إنه عنده نية نقية ولا إنه كان بيحاول من قلبه لأنه بيبقى
فاهم إن اللي مش شايف قيمته مش هيشوفها حتى لو فضل يقدم روحه على طبق من ذهب وفي اللحظة دي بالذات يبدأ الإنسان يفهم إن الراحة مش في الناس اللي حوليه لكن في المسافة اللي بينه وبين اللي بيأذيه وإن السلام مش في كثرة العلاقات لكن في صدق علاقة واحدة وإن القوة مش في التحمّل لكن في القدرة تقول كفاية وتقول لأ وتقول أنا استاهل أحسن من كده ومع الوقت
يفهم إن ربنا بيفتح أبواب مش بيشوفها إلا لما يقفل أبواب كان فاكرها نعمة وهي كانت استنزاف وإن في آخر كل وجع في حكمة وفي آخر كل خسارة في مكسب حتى لو جه متأخر وإن اللي اتعلمه من الألم عمره ما كان هيلاقيه في الفرح وإن اللي اكتشفه لما سكت أهم من اللي اكتشفه وهو بيتكلم وفي النهاية يفوق على حقيقة واضحة زي الشمس إن القلب اللي صبر كتير مش ضعيف لكنه نقي
زيادة عن اللزوم وإن النقاء ده مش ضعف ده هدية من ربنا لازم يحافظ عليها حتى لو اضطر يبعد عن اللي ماقدّروش قيمتها وإن الصبر ده مش استسلام لكن استعداد لأن يستقبل حياة جديدة وأفضل وأهدأ وأقوى لأن القلب اللي وصل للحد ده عرف قيمته وفهم قدرته وعرف أنه يستحق أشياء ما كانش بيتخيلها
