صاحب ابنك

صاحب ابنك

بقلم / رانيا البدرى 

متعودوش أولادكم على الإجبار فى أى شيء.

عودوهم أنكم بتاخدو رأيهم بالذات فى الحاجات اللي تخصهم خروجة هتروحوها سوا أو مصيف ،،، حتى لو مش هتعملوا

برأيهم المهم متحسسوش أنه كمالة عدد 

اباء كتير ماشيين بمبدأ أن لو سمعت لأبنى هيتعود

على النقاش و كتر الكلام فبيريح دماغه و يكبت الطفل من صغره و هو ميعرفش أنه كدة بيطلع للمجتمع شخصية ضعيفة و مهزوزة .

القسوة مش بتربى ولا الدلع الزيادة 

اللى بيربى بجد الحنية هتخلي ابنك يحترمك ويخاف يعمل حاجة تزعلك و دة احسن بكتير من أنه يخاف من عقابك

متجبروش على دراسة معينة أو شغل أو جواز 

حتى لو من باب حرصك على مصلحته .. سيبه يختار و يتحمل نتيجة اختياره لأنه حتى لو فشل دة هيبنى جزء فى شخصيته هيساعده فى اختياراته بعد كدة ، محدش بيتعلم بالنصيحة كلنا بنتعلم بالتجربة .

و بنتك … متجبرهاش على الحجاب !!

كفاية تعرفها من صغرها أنه فرض على كل مسلمة بالغة و سيبها هى تحدد الوقت المناسب ليها أنها تلبسه عن اقتناع ،،،، اى حد بيتجبر على حاجه بيتركها اول ما تجيله فرصة يعمل كدة 

   اللى بنعمله إبتغاء مرضاة الله مش بنرجع فيه

   لكن اللى بنعمله لكسب رضا الناس عمره ما بيدوم

صاحب ابنك