صلاحيتنا انتهت
كتب: محمد كمال قريش
كان نفسنا نركب قطر الحياة
لكنه هرب وموقفش!!
أوقات بنعيش فيها
وأوقات مبنتنفسش
الفرحة يادوب ساعة ونقضيها
وساعات الحزن متتعدش.
دموع كتيرة في ليالينا
وفي نهارنا نداريها متتشافش!
حزننا آه باين في عنينا
بس احنا جامدين مبنتهزش!
سنين وسنين ياما عملت فينا
ونقول الأيام الحلوة لسه مجاتش!
اللي نحبه يبكينا
ونقول أصل الحلو ميكملش!
أغراب إحنا في أرضنا
ومستكترين علينا الغربة!
عايشين بس اسمنا
والروح من زمان حاضناها التربة!
يا دموع يا ألم
يا شموع في ليل كئيب
دا وجود ولّا عدم
دي حياة ولّا تعذيب؟!
لا أمل لا أحلام
كله بقى حبر على ورق
السنين هي اللي عدت أوام
ولا العمر اللي اتسرق؟
بلاد بقت حزينة بشوارعها
وناس تايهين ضايعين
ناس تصرخ ولا حد سامعها
وناس فوق فوق ومش حاسين
وادي اللي بنسميها حياه
خلصت وكل حاجة انتهت
ولا يوم حلو عشناه
ولا دموعنا من عيونا اختفت
سيبونا نمشي بقى
واكتبوا على قبرنا…
“حاولوا أن يعيشوا، لكن أرواحهم أبت”
وهاتوا الذنب علينا…
احنا كده كده ناس مدة صلاحيتها انتهت..صلاحيتنا انتهت
