ظــل الــكــلام الــلــي مــا اتــقــالــش
بقلم/نشأت البسيوني
في حكايات كتير بنفتكر إن اللي وجعنا هو اللي حصل لكن الحقيقة إن اللي ما حصلش أقسى وإن الكلام اللي ما نطقناهش في وقته بيعيش جوانا أطول من أي جرح ظاهر الوجع الحقيقي مش في الخسارة الوجع في الفرص اللي ضاعت في الصمت اللي أكل صوتنا في اللحظة اللي كان المفروض نواجه فيها وما واجهناش وفي المواقف اللي كنا محتاجين نقف فيها لنفسنا وما عرفناش في راجل
كان شايل جواه كلام سنين كلام عن حب ما اكتملش وعن وداع ما اتفهمش وعن غلطة ما قدرش يصلحها كان فاكر إن المشاعر بتتبخر مع الأيام وإن القلب لما يقسى بينسى لكن الحقيقة إن المشاعر بتتحول لظل ظل ماشي وراه في كل مكان حتى لو تجاهله حتى لو كابر حتى لو لبس ألف قناع عشان يخبي اللي جواه هو كان بيحب واحدة حب صادق حب نضيف مالوش مصالح ولا حسابات كان
شايف فيها وطن وعمر وأمان ولما ضاعت منه ما قالش ولا كلمة رجولة خوف كبرياء هو نفسه ما كانش عارف بس اللي عرفه متأخر إن الكلام اللي اتبلع بيتحول لوجع وإن اللي بنسكت عنه مش بيموت بس بيدفن نفسه جوا القلب لحد ما يطلع في وقت ما ينفعش فيه يصلح حاجة عدت السنين وهو شايفها من بعيد شايف حياتها بتتغير يمكن نجحت يمكن تعثرت يمكن اتوجعت يمكن لقت
اللي يستحقها لكنه هو فضل واقف في مكانه جوا نفسه قلبه لسه محبوس عند اللحظة اللي سابها تمشي فيها من غير ما يقول لها استني من غير ما يقول لها انا محتاجك من غير ما يقول بحبك والأصعب إنها ماتبقتش فاكرة التفاصيل لكن هو كل تفصيلة لسه محفورة جواه ضحكتها طريق مشيهم سوا الكلمة اللي كانت هتتقال وما خرجتش والنظرة اللي كانت ممكن تغير مستقبلهم لو حد فيهم
اتشجع كبر واتغير وتبدلت الدنيا عليه لكن في كل مرة يقف قدام مرايته يحس إن في شخص تاني واقف جنبه الشخص اللي ضيع كل حاجة بسبب خوف واحد الشخص اللي كان يقدر يحارب وما حاربش الشخص اللي سيب قدره يفلت من إيده وهو ساكت وفي يوم شافها صدفة مشيت من جنبه عادي زي أي حد بس قلبه قلبه وقع رجع تاني يعيش اللي دفنه رجع يشم الوقت اللي هرب رجع
يصارع نفس السؤال ليه ما قلتش ليه سبتها ليه اخترت الصمت لكن الدنيا ما بترجعش حاجة راحت والماضي ما بيترقعش مهما حاولنا والصوت اللي ما خرجش زمان خلاص فقد قيمته لما اتأخر والتردد اللي كان بسيط اتحول لندم وندم السنين تقيل ما بيتشالوش ولا يتقاسم عرف وقتها إن الخسارة مش إنها مشيت الخسارة إنه عمره
ما امتلك لحظة الشجاعة اللي كان مستنيها وإن الظل اللي ماشي وراه هو صدى الكلام اللي ما اتقالش وفي الآخر فهم الدرس إن الكلمة اللي بنقولها متأخر زي الباب اللي بنتخيله مفتوح ولما نوصل عنده نلاقيه اتقفل للأبد والوجع الحقيقي إننا نفضل عمر كامل نلوم نفسنا على جملة واحدة كان لازم تتقال وما اتقالتش
ظــل الــكــلام الــلــي مــا اتــقــالــش
