بقلم/نشأت البسيوني
في لحظات كتير الانسان بيحس ان في حاجة جواه واقفة على طرف حياته مستنية دورها اللي عمره ما جه تحس ان في ظل بيمشي وراك مش خوف ولا ندم لكنه نسخة منك اتأجلت اكتر من اللازم نسخة كان المفروض تطلع للنور بس انت كل مرة كنت تقول مش دلوقتي لسه بدرى مش جاهز ومع مرور الوقت الظل بقى بيتضخم وانت بتصغر قدامه الظل المؤجل هو الحلم اللي ما
اديهتوش فرصة والقرار اللي هربت منه والمشوار اللي كنت قادر تكمله بس اخترت ترجع قبل ما توصله مش لأنك ضعيف لكن لأنك اتعودت تأجل كل شيء يخصك لحد ما اليوم اللي كنت مستنيه بقى مجرد تاريخ عدى ومفيش حاجة اتغيرت غير احساسك إنك اتأخرت اوي ومع إن الوقت ما بيرجعش لكنه بيكشف الحقيقة الحقيقة إن التأجيل مش حماية زي ما كنت فاكر التأجيل كان خوف لابس قناع
الحكمة وتردد لابس قناع التفكير الزيادة وكل ما تأجل تزيد الفجوة بين اللي انت عليه واللي كنت ممكن تكونه لدرجة إنك ساعات بتبقى مش متأكد مين فيهم الحقيقي لكن اللي ما يعرفهوش ناس كتير إن الظل المؤجل مش بيموت ولا بيختفي هو واقف مستني لحظة واحدة تكسر بيها العادة اللي سجنتك ومستني كلمة تقولها لنفسك كفاية ومستني خطوة صغيرة تثبت إنك اخيرا سمعت النداء
اللي كان بيتكرر جواك من سنين ومهما كان التأخير كبير الفرصة لسه موجودة لأن الظل مش عدوك بالعكس ده الجزء اللي بيحبك بجد الجزء اللي رافض تستسلم رافض تفضل نسخة باهتة رافض تعيش حياة مش بتاعتك الظل المؤجل هو انت لكن النسخة اللي تستحق الظهور وفي اللحظة اللي تاخد فيها نفس عميق وتقرر تواجه مش تهرب وتتحرك مش تؤجل ساعتها الظل مش هيبقى مؤجل تاني هيبقى انت الحقيقي اللي كان مستنيك من زمان.
