فاكر
احمد عبد الرازق الزعويلي
فاكر لما كنا بنقسم سوا سوا الرغيف
تاكل حته منه وتديهولي
تقولي عايز اخس عايز ابقي خفيف
انا كنت عارفة انك ممعكش
تمن رغيق تاني
لكن كنت سعيدة ما انت المني والأماني
فاكر لما كنا نمشي لساعات وساعات
وتعدي الف عربية ويعدي الوقت
يسرق من لقانا اللحظات
فاكر لما كنا علي شط النيل نتهامس
وتعدي مركبة تقول لي
شايفة المركب تيجي نركب مركب
اقولك شايفة وشك
بعيد عن وشك نظري ضعيف
مش عايزة اشوف حاجة غيرك
عايزة صورتك تترسم في عنيا
اشوف فيها كل ألوان الطيف
وابوس الفجر علي خدك
ونور جبينك العفيف
فاكر لما قولتلي السعادة انتي
والروح انتي
عايز اكون مالك قلبك.مش عايز ابقي ضيف
مرت سنين وسنين يا تري
فين طيفك وانت الشتا والصيف
يأتري فين أمنياتك.ضحكتك
ولا ربيعنا ولي وبقينا في الخريف
عارفاك شريف راضي وقانع
طول عمرك لا متطلع ولا طالع
شاعر…عاشق..شفيع وشافع
للعاشق والفقير.كريم للضيف
فاكر لما اقولك انت الأمير مش ضيف
تقولي والأميرة لو غدرت
غدرها اقوي من ضربة السيف
مش عايزة اقول غلطانة …ندمانة
طب يعمل ايه عقلك وطيبتك
مع ست معدومة التصريف
ارجعلي وخلي الود دائم
مبقاش في عمرنا غير القليل
وان كنت غلطانة بقولك
اسفة يا سيدي الأمير
اسفة يا سيدي الأمير
