فضفضة .. فى كلمتين
كتب/سعيد ابراهيم
امس بعد مشاهدة كلمة الرئيس السيسى
في افتتاح المؤتمر العالمي للسكان والصحة والتنمية 2023
داهمنى شعور وأمنية إنه ياريت كانت دولتنا دولة قمعية …
مش قمعية بس … لكن قمعية قاهرة كمان بكل ماتحمله الكلمة من معانى … و انا بيرن فى ودانى كلمة الراحل عمر سليمان لما قال إن الشعب المصرى غير مؤهل للديموقراطية
حديث الرئيس السيسى النهاردة وهو بيضرب امثلة كتيرة لكل التحديات اللى بيواجهها فى كل خطوة بيخطيها .. وانا هنا باتكلم عن التحديات الداخلية مش الخارجية … خلانى اسأل سؤال واحد فقط … “هو إزاى الراجل ده مش بيجيله يأس واحباط من اللى بيحصل حواليه” !!؟
تحديات ممثلة فى أفراد سواء بشكل فردى أو من خلال ما يمثلونهم من مؤسسات .. مش عايزين فعلا البلد دى تخطى للأمام .. لمجرد إنهم مستفيدين من الوضع الخاطئ والمتردى اللى كانوا عايشين فيه … الوضع اللى هم اصلا كانوا بيشتموا فيه .. وبيطالبوا بتغييره .. ولما حان وقت التغيير ولقوا إنهم هيفقدوا بعض المكتسبات .. برغم إنهم مش هيخسروا فعليا … وقفوا فى وجه التغيير بكل ما أوتوا من قوة .. واصبحوا معوقين لكل خطوة بتخطيها الدولة للأمام !!
من أول بقى بعض رجال الأعمال .. لممثلين مافيا الصناعات المختلفة .. للمتربحين من الاوضاع الاحتكارية .. لموظفين الجهاز الادارى .. للمحليات .. للتجار .. للاعلاميين .. لممثلى بعض النقابات .. وصولا لبعض المواطنين … الخ الخ الخ .. وطبعا ناهيك عن جحافل ولجان الاخوان بقنواتهم بإعلامهم بسلاطاتهم ببابا غنوجهم .. ووراهم تابعهم قفة المكروبين اخوانيا واللى بيلزقوا نفسهم فيما يسمى بالمعارضة
وسواء دوول أو دوول أو دوول … كلهم قاعدين ينظروا على الدولة .. ومش بيساعدوها .. وماسكين فى ايديهم السكاكين وعمالين يقطعوا فيها .. ولو الدولة راحت شمال يقولك لأ كان المفروض تمشى يمين .. ولو راحت يمين يقولك لأ كان مفروض تمشى شمال …
ولما الدولة تقول لهم يالا بينا ايدينا فى إيد بعض .. يعملوا كدة زى اليهود لما قالوا لسيدنا موسى: اذهب انت وربك فقاتلا، إنا ها هنا قاعدون !! .. يعنى لسان حال ناس كتير روح انت شيل الطين على دماغك وخلص كل حاجة وبعدين ابقى ابعتلنا نيجى نركب على الجاهز !
احنا بنقول كدة لييه … !!؟
بنقول كدة علشان النغمة اللى دايرة بقالها فترة مفيش حاجة بتتعمل غير كبارى وطرق، مفيش تقدم، الحالة بتسوء والمواطن بيأن وشوف الدول اللي كانت متأخره بقت فين واحنا فين
شوفوا الصين عملت اييه ووصلت لفين !!؟”
ياحبيبى هو انت بتشتغل زى المواطن الصينى !!؟
طب بلاش دى علشان الكلمة دى بتزعل ناس كتير
طب هو انت تقدر على النموذج الصينى اصلاً !؟
حضرتك مش مستحمل سنتين او ثلاثه لحين الأحوال ما تتحسن
بينما الصين سنة 75 كان وضعها أسوء من وضع مصر
لكن الصين قعدت أكثر من 30 سنة فى سياسة قمعية قاهرة مافيش فيها هزار … لحد ما وصلت للى هى فيه النهاردة …. كان اللى بيزوغ من دفع تذكرة المترو بياخد مؤبد … واللى بيخلف طفل ثانى بيتعدم .. واللى بيفتح بقه مابيلحقش يقفله تانى … ولما فكرت مجموعة من الناس فى الثمانينات ، تعمل فيها ديموكراسى وكدة .. وتنزل تتظاهر … نزلت دبابات الجيش ساوتهم بالأسفلت حرفيا … واهاليهم علشان يستلموا اشلائهم كانوا لازم يدفعوا الأول ثمن الرصاصة اللى موتتهم !!
ولما الرئيس قال أمس أرفض وجود حرية مطلقة في الإنجاب لأناس قد لا تكون مدركة حجم التحدي، لأن الدولة هي التي تدفع الثمن في النهاية كان عنده حق
إحنا عندنا فى البلد ناس مش عدوة البلد .. لأ .. دى عدوة نفسها … وكان نفسى فعلا اشوفهم فى نموذج دولة قمعية …
لكن للأسف .. الدولة المصرية الجديدة مش كدة … واكيد ربنا هيقف معانا وينصرنا لأجل خاطر الناس اللى تستحق حياة افضل .. ولو كره المبطلون
ربنا يحمي مصر برئيسها وجيشها وشعبها
#حفظ_الله_مصر فضفضة .. فى كلمتين
