أحلام مع أوهام .
لملِمْ معي شويِّة حِلم 💭
بلكي شي مرّة أُكمُشِ الأحلام .
لدغة وجَع وهمومْ خدَّرني الزّمن
وسدَّد المرمى عليِّ سهام .
لوعة وحزن وحكاية شياطين
يا ريت فيّي كسّر الأصنام .
وإرجع بعمري شي عشر سنين
وخبّي عيون النَّوم حتى نام .
لُغز الزمن باقي لغز مختوم
مرّة زعل ومرّة حكي وأوهام .
لوح القدر مكتوب عا جبيني
شو ما عملت ما غيّرت أحكام .
يمكن دني ظلمة وشؤم ودموع
حَكم الدهر عَها الصّبي إعدام .
حطّيت أوهامي كلّها فوق الرفوف
وقفت الحلم وكسّرت ل قلام .
شعر باللهجة المحكية مهدي خليل البزال
13/8/2023
