بتاريخ 28/7/2023
إعلان وفاة
بقلم الشاعر المصري أحمد إبراهيم النجار
كم وعد و إنتي بتوعدي
لااااااااااا إبعدي
أصبحتي شئ مالهوش تمن
مليون خريف فى حر صيف
وأنا فيكِ بدفع دمعتي
ملعون شروقك
لو فى يوم راح يتوجد
طال الغروب
وباعده عني بسمتي
لوحة عذاب
بإيدكِ فيا بترسمي
ماضي وحاضر بين دروبك
بلعن ظروفك
بلعن فى صمتك السكات
هتقولي إيه ؟ إتكلمي
الوقت فااااااااات
والحلم ماااااات
والليل وحالك بالسواد
ولسه قاعدة بتضحكي؟
أُرقصي بين الجفاف
وسط الشقوق وسط الدروب
وسط الخراب وإتحزّمي
مابقاش خلاص
حبة فتاااااااااات
والفجر مااااااات
سامع صراخ الجبّانات
ودموع بتنزل بالساعات
واللون سواد
كاسي فى توبك طرحتك
والفجر مكتوم ف الأذان
والله غريبه ركعتك
إستسلمي
لطقوس طلاسم فى البارات
والخمر م النوع العتيق
رقص ونهيق ملعون يا ديك
ملعون يا ديك مالهوش أذان
أطرش ودان أعمى العينين
عرق الجبين
نازل بيصرخ م التعب
ولسه إنتي بترقصي؟
فجري إتسلب
والليل معشش
ع الجزوع المحروقين
طااااال الأنين
ماااااات الحنين
متألمين مابين عيوني دمعتي
طب كنتي فين من كام سنه؟
وعدتي قلبي بالفرح
وقتلتي فيا فرحتي
خدك مرار صبار طرح
من كاس مرارك برتوي
كم وعد وأنتي بتوعدي
لاااااااا إبعدي
كرهك وكاره ضحكتك
كاره وجودي ف حضرتك
كاره نفاق
كل اللى نافق ع الخراب
ده الشعر شاب
والقلب شايل م العذاب
تلال جبال
والفجر أصبح شئ محال
شايفك بعيني بتبعدي
والبحر مسجور من سنين
ملعون يا ليل وسط الصراخ
مابين قبور الصابرين
والموت أكيد
لو حتى فيه أنفاس حياه
صرخة باااااااااااااه
طالت مدى
وع الأغاني بترقصي؟
وشيطان بيضحك ع الدموع
سارق شطوط كل العسل
وف إيده حبل من مسد
ملعون زليل بين الجموع
بين البيبان خلف البيبان
وسط الشوارع والحارات
بين النجوع قلة حبوب زاد الجفاف
وصرخة فيا دمعتي
كرهك انا مليوووون سنه
بكتب نهايتي ف قصتي
خارج أنا مابين سطور
كل الحروف
بعلن وفاتي ف رحلتي
بلعن غروبك ع الملأ
وبأي وعد هتوعدي
لاااااااا إبعدي
بقلم الشاعر المصري أحمد إبراهيم النجار
