بتاريخ 28/6/2023
الشاعر المصري أحمد إبراهيم النجار
يكتب ( برغم البُعاد )
وبرجع وغنّي بغنوة تمنّي
وأحضن عنيكِ فى ليلة ربيع
يا روحي إللي مني
ده سحرك فاتنّي
لعمري فى ثانية ليكِ هبيع
يا ملكه فؤادي
وعشقي ومرادي
بحلم بحضنك
كا عشق الرضيع
يا قصة وحكاية
يا لحن ف غُنايه
يا بدر ف سمايه
يا حصني المنيع
بحبك
عشقتك
كتبتك
ندهتك
ودايب ف حُبك وحُسنك بديع
يا عطر الجناين وبعشق وهايم
بهمس الشفايف فى بعدك حبيبتي
فى بعدك بضيع
تعالي ف حضني ده بُعدك ألمني
وشوقي اللي فايض
ما بين السنين
فى ننك خضاري
يا شمس ف نهاري
وقمري اللي عايش
فى قلبي الوليد
يا فصل الجمال
ومسك الغزال
يا كل التمني
واجمل حقيقة
وأجمل خيال
يا عشقي الوحيد
ندهتك
سِكنتك
رسمتك
وعشتك
يا وطني البعيد
يا غايبه وحاضرة
وساكنه ومالكه
صميم الفؤاد
يا نهر الحنين
وبرجع وغنّي بغنوة تمنّي
وأحضن عنيكِ
فى ليلة ربيع
يا بلسم جروحي
يا ساكنه فى روحي
بننك وبوحي
وقولي النشيد
سلام الحبايب
بغمزة رموش
وبسمة شفايف
فى خدك ورود
وسحر عيونك
ما بيرحموش
ودايب ودايب
يا سارقه القلوب
وخاطفه العقول
بنظرة عيونك
وضحكة خدودك
سلامي لصوتك
فى أجمل نشيد
علَمي دي صورتك
وطني ده حضنك
روحي فى قربك
يا كل الكواكب يا كل الجهات
يا كل الحدود
لا غيرك حبيبة فى قلبي قريبة
يا صافيه وبريئه
بغرّب وشرّق ف حُبك وبغرّق
فى شهدك وابات
واغني ف صمتي بعشقي بهمسي
يطول السكات
ونظرة عينينا ولمسة إيدينا
وروحنا اللي بينا
بتحكي ف ساعات
وتجري الساعات
ويعلى الخيال وأنسى الوجود
وأنسي الزمان وحتى المكان
لإنك ده كوني
وعشقي وجنوني
يا ساكنه ف عيوني
برغم البعاد
بحبك يا عايشه برغم الظروف
برغم الأهات
برغم إشتياقي للمسة ضفايرك
لقربك وحُضنك
يا صبري وصابرك
ف طول البِغاد
بحبك بحبك واسمك حبيبتي
ف شهادة ميلاد
وصورتك فى بالي
رسمها الفؤاد
بلادي بلادي عيونك مُرادي
يردد فؤادي
بحبك حبيبتي بكل اللغات
بقلم الشاعر المصري أحمد إبراهيم النجار
