رياحين الديار
بقلم
خيرى ناصف khayry nassef
البنات ورِقِّتها وجمالها وجمال خِلفتها
هى الأم وهى الزوجه وهى الأخت وهى البنت وشوف حلاوتها
هى الضهر وهى الستر وقت الجَد وعمود واقف جوة ف بيتها
هى شُعاع النور و البسمه وأجمل ضحكه وهى الرحمه بحنيتها
هى جمال الدنيا بحالها بكل احوالها ف كل حالاتها
حبيبة أبوها وتوأم أخوها وهما كمان علاطول مرايتها
أصل حياتهم وراحة بالهم مبتنفعش غير براحتها
لما بتُنكُش جُوه ف بيتها يادى الدَوشه ويا اخواتها وويا مامتها
حَبَّه بتبكى وحَبَّه بتضحك علشان تعرف فين مكانتها و فين غلاوتها
وأما بيحصل يوم تتأثر ولابتزعل ولا تكشر يبقى دفاعاً عن كرامتها
واوعى يخونك عقلك أبداً ولا تفكر تلغى كيانها وشخصيتها
وإن كان عندك قدرة وفرصه إبقى إتكلم عن سُمعتها
وقت الجد تكون قناصه وتعرف إمتى تصِيد فريستها
إسمع منى وخدها خلاصه التربيه أساسى ف بيتها
ووقت الشده بشكل حماسى ما تشوف أقوى من ضربتها
خُد لك فكره إن كنت ناسى أنا مش ضامن عصبيتها
تبقى سفيرة وتبقى وزيرة وتبقى محامى وفخر عيلتها
هى الشخص الداعم لينا تِفضل عايشه وتحمى رايتها
