صاحب نفسك
خواطر أغاني الأسواني
الشريف_أحمدعبدالدايم
لمّا تصاحب .. صاحب نفسـك
على الاقل تعرف مين بينافسك
صاحب نفسك ترتاح
ليه تصاحب صاحب عكسك
**….**….**….**
كانوا الصحاب أصلي وخلّصوا
دلوقتي تقليد وفالصوا
فيه صاحب بضمان سـنتين
خلص الضمان إحذر غدره
**….**….**….**
وصاحب صيني مالوش ضمان
نازل جديد بـ 3 ألوان
ممكن تطبله بالتليفون
يايجي لك ديلفري عالعنوان
**….**….**….**
وصاحب صاحب مصلحته
تفتح له جيبك .. ريحّـته
ولو طالبته باللي عليه
يزعل يقول انت جرحته
**….**….**….**
وموديل نازل بـ 2 وش
وِشْ الطيبة ووِشْ الغشْ
دايماً إيده على قلبه
ودايماً للي معاه بيرُشْ
**….**….**….**
وأصحاب تخصصّهم تفاريح
فاضيين بيضحكوا ع المجاريح
طول الليل يقولوا كلام
تطلع عليه الشـمس يسـيح
**….**….**….**
باعوا وضاع الصاحب الجدّ
باعه الخسيس بثمنه ما عدّ
غلبان و 100 ســبت يقدم
طول عمره عاش منتظر الحَدّ
**….**….**….**
إحنا في زمن صاحبك مالك
مفتاح الســحر لأعمالك
لو أعمى تلاقي عيون حواليك
ولو كًنت قبيح سِرّ جمالك
صاحب نفسك
الشريف_أحمدعبدالدايم
