ما لا يقال
بقلم/نشأت البسيوني
في مساحات كبيرة من حياتنا بنعدي عليها وإحنا ساكتين مش لأننا ضعاف ولا لأن الكلام مش موجود لكن لأن اللي جوانا أكبر بكتير من إن كلمة تشرحه وأعمق من إن جملة توصفه وفي وقت معين هتعرف إن في حاجات اتكسرت فيك وما رجعتش زي ما كانت وإن في ناس عدت عليك وما كانتش مجرد مرور كانت نقطة تحول يا إما رفعتك لفوق يا إما رمتك تحت التراب الدنيا دايما تدي ظهرها
للي بيمشي مستقيم وتفتح حضنها للي بيلعبها صح لكن في شخصيات اتخلقت ضد القاعدة اتخلقت تمشي صح حتى لو العالم كله بيقول الطريق غلط اتخلقت تحافظ على ضميرها حتى لو الناس كلها باعت اتخلقت تهتم حتى لو محدش سأل واتخلقت تتحمل رغم إن الحمل فوق طاقتها في نفوس صلبة اتربت على الصبر واتعلمت تقف من غير ما تقول تعبت واتعودت تشيل حملها
بنفسها من غير شكوى مش عشان ما فيش وجع لكن لأن الشكوى مش دايما بتسند أوقات الشكوى بتكسر وبتهد اللي باقي منك وبتعريك قدام ناس ما تستحقش تشوف ضعفك فبتختار تبلع الكلام وتدفن الوجع جواك وتكمل الطريق لوحدك والأيام تمتحنك اختبار ورا اختبار وتضغط عليك لحد ما توصل حافة الانهيار وتلاقي نفسك واقف رغم إن المفروض تكون واقع وتلاقي روحك بتنقذك
في آخر لحظة وتقول لنفسك إنك مش هتنهزم وإنك مهما اتكسرت هتقوم ومهما اتظلمت هتعدي ومهما اتسحبت منك الطيبة والعشم هتفضل إنسان مش نسخة مكررة من قسوة العالم في ناس مش بتفهمك وناس مش هتحاول تفهمك وناس تاخدك بسطحية وتفتكر هدوءك برود وتعبيرك حكمة زيادة وابتسامتك قوة خارقة لكن اللي جوه قلبك محدش يعرفه غير ربك اللي شايفك وبيهديك في
لحظات كنت فيها على وشك الانتهاء وفي لحظة من اللحظات هتعرف إن كل اللي حصل لك كان ترتيب وإن اللي وقعك كان بيجهزك وإن اللي كسرك كان بيقويك وإن اللي سابك كان بيحميك وإن الطريق اللي اتسدت قدامك كان بيحميك من طريق أسوأ وإن ربنا بيكتب لك رغم الصعوبات نهايات ما تخطرش على بالك
ويمكن أوجع حاجة مش اللي اتاخد منك لكن اللي فضل جواك من
أثر اللي حصل ويمكن أجمل حاجة إن رغم كل ده لسه فيك نور لسه فيك إصرار ولسه فيك روح تعرف توقف وتكمل وتقاوم حتى لو محدش فهمك ولا سمعك انت مش عادي انت شخص اتخلق من معارك وكل جرح فيك علامة انتصار وكل صبر فيك حكاية وكل سكوت فيك قوة وكل وقفة بعد سقوط شهادة ميلاد جديدة ليك
