وجه لا ينسى
بقلم/نشأت البسيوني
في حياة كل واحد فينا فيه وجه ما يعرفش الغياب وجه يفضل واقف في الذاكرة حتى لو الناس اتغيرت وحتى لو الدنيا مشيت وحتى لو العمر خدنا في اتجاهات ما كناش مخططين لها الوجه ده مش لازم يكون لحد موجود دلوقتي لكنه موجود في الأثر موجود في اللحظة اللي بدلت حاجة جوانا من غير ما ناخد بالنا موجود في كلمة اتقالت بصدق في يوم صعب أو نظرة عدت علينا وخلت قلوبنا
تهدى بعد دوشة كبيرة وجه لا ينسى مش شرط يكون أجمل ولا أقرب ولا أكتر حد كان موجود لكن يكون أكتر حد لمس جرح ما حدش شافه أو فهم شعور ما حدش حسه أو مسك الباب قبل ما يتقفل أو قال كلمة مظبوطة في توقيت كان خلاص فيه كل حاجة بتتخلى أو حتى مشي بس مشيه كان كفاية يفوقك والغريب إن الوجه ده يفضل حاضر من غير ما يطلب حضور يفضل ثابت حتى
لو أصحابه اختفوا يفضل جواه ضوء خفيف بيعلمك تفتكر إن الحياة لسه فيها ناس صادقة وإن اللحظات الحقيقية مهما كانت قصيرة بتعيش أطول من الأيام كلها وجه لا ينسى يظهر فجأة وانت سايق أو قاعد لوحدك أو بتسمع أغنية قديمة أو ماشي في شارع مفيهوش أي علاقة بالماضي بس عقلك يفتحه كأنه لسه هنا قدامك كأنه ما اختفاش كأنه جاي يراجع معاك اللي اتغير فيك ومع مرور
الوقت الإنسان يفهم إن الوجوه اللي ما بتتنسيش مش بتتعلق بقلوبنا علشان نرجعها لكن علشان نكمل من غير ما نفقد إنسانيتنا علشان نفتكر إن في يوم كان في حد نور نقطة في الروح علشان نعرف إن مفيش ألم بيكمل ولا فرح بينسى ولا ذكرى بتيجي عبث
الوجه الذي لا ينسى مش ذكرى عابرة هو علامة من علامات العمر ودليل إن الروح ما زالت قابلة تحس وتفتكر وتسامح وتعيش مهما الليالي أخدت منها
وجه لا ينسى
