وجوه الناس اللي عدت في حياتك وسابت علامة ما بتروحش
بقلم/نشأت البسيوني
في ناس بتعدي على حياتك كأنهم نسمة صيف خفيفة تيجي وتروح وما تسيبش أثر وفي ناس تانية بتعدي كأنهم زلزال يهد قلبك من أساسه ويعيد ترتيب روحك من أول وجديد وفي النوع اللي بينطقك من غير ما تتكلم ويخليك تفكر ألف مرة قبل ما تفتح باب لقلبك تاني لأن الوجع اللي سبوه مش وجع عادي وجع يفضل عايش فيك حتى بعد ما الناس دي تختفي حتى بعد ما الزمن
يبعدكم حتى بعد ما تحاول تنساهم بكل الطرق أكتر حاجة مؤلمة مش إن حد يمشي من حياتك أكتر حاجة مؤلمة إنك تكتشف إنهم ما كانوش ليك من البداية وإنك كنت شايل قيمتهم أكبر من اللي يستحقوه وإنك كنت بتدي مشاعر حقيقية لناس كانت شايفاك محطة مؤقتة مش وطن وكنت بتحلم ببساطة وانت فاكر إن الحلم ده هيشاركوك فيه وفي الآخر تلاقي نفسك واقف في نص الطريق
ماسك نفس الحلم بس من غيرهم وبتسأل روحك هو ليه النهاية كانت بالشكل ده وتلاقي نفسك بتفتكر تفاصيل صغيرة ما لهاش قيمة عند حد غيرك تفاصيل ما حدش هيعرف وزنها غير اللي عاشها زي ضحكة كانت بتطمنك كلمة كانت بترجعك للحياة وجود بسيط يخليك حاسس إن الدنيا لسه بخير وفجأة كل ده يختفي فجأة يخليك لوحدك فجأة تبقى الذكريات أقسى من الوجع نفسه لأن اللي
بيفضل بعد اختفاء الناس مش صورهم اللي في عقلك اللي بيفضل هو الإحساس اللي سابوه جوه روحك الإحساس اللي يطلع مرة واحدة من غير ما تستأذن نفسك في ناس سابت جواك علامة غصب عنك علامة مش جميلة ولا مفرحة علامة بتوجع كل ما تيجي في بالك علامة بتفكرك انك في يوم كنت أضعف مما لازم وصدقت كلمة ما كانش لازم تصدقها وفتحت باب ما كانش لازم
يتفتح واديت قلبك لحد ما كانش ليه مكان جواه وفي الآخر صدقت إن المشكلة فيك وإنك مش كفاية وإنك السبب وإنك كنت غلط وانت أصلاً كنت أنضف من إنك تظلم حد أو تقسي على حد أو تبيع حد والأقسى إنك بعد ما تتكسر مش بتعرف ترجع نفس الشخص اللي كنت عليه قبل ما يدخلوا حياتك بتتغير من غير ما تحس قلبك يبقى أعمق بس أتقل روحك تبقى أقوى بس أوجع
صمتك يبقى أطول كلامك يبقى أقل وثقتك تبقى حذرة مش لأنك قاسي لكن لأنك اتعلمت من وجع الناس اللي كانوا المفروض يكونوا أمانك وطلعوا هما نفسها الطعنة اللي دمرت الجزء الطيب فيك
وفي لحظة معينة هتقعد مع نفسك في هدوء وتسألها كل اللي عدوا في حياتي راحوا ليه وهتفهم وقتها إن ربنا كان بيبعد عنك حد ما يستاهلكش وبيفتحلك طريق لحد أحسن يمكن لسه مجاش يمكن
لسه الطريق طويل بس أكيد هيجي لأن الشخص اللي عرف يعني ايه الوجع وعرف يعني ايه الخذلان وعرف يعني ايه يوقف نفسه على رجليها بعد ما وقعت مش مستحيل يلاقي اللي يقدره واللي يعرف قيمته ويمكن أكبر درس تتعلمه من وجوه الناس اللي سابتك إنك ما تعطيش قلبك بسهولة وما تحطش روحك في إيد حد ما يقدرش يشيلها وإنك تكون قوي من غير ما تبقى قاسي وتكون
طيب من غير ما تكون سهل وتكون موجود لنفسك قبل ما تكون موجود لحد لأن الحقيقة اللي ما فيش مفر منها إن كل اللي مشيوا
كان لازم يمشوا وكل اللي راحوا كان لازم يروحوا وكل العلامات اللي سابوها كانت سبب إنها تبقى أنت بالشكل اللي انت عليه دلوقتي أوجع أعمق أنضج وأقوى من كل اللي كسرك قبل كده
