حين يعيدك الطريق إلى نفسك
بقلم/نشأت البسيوني
حين يعيدك الطريق إلى نفسك وتكتشف إنك طول عمرك كنت بتدور على حاجات بره رغم إن كل الإجابات كانت جواك تلاقي إنك كنت ماشي وسط زحمه الأيام وانت مش واخد بالك إن روحك كانت بتنده عليك من بعيد بتحاول تفكرك إنك تستاهل راحه أكتر من التعب وإنك محتاج تبطل تركض ورا اللي مش ليك وتتبصر في اللي ربنا بيبعده عن طريقك قبل ما يكسر قلبك أكتر وتبتدي تشوف
إنك كنت تايه بين اللي فات واللي جاي ومش قادر تحدد أنت بتجري ورا إيه ولا ليه في حاجات بتختفي فجأه من غير حتى ما تديك وقت ترتب فيه نفسك لكنك مع كل ده بتتعلم حتى وانت موجوع بتعرف إن كل مره اتوجعت فيها كانت بتبني جواك حجر جديد من قوتك وإن كل خذلان كان بيزقك لقدام حتى لو حسيت وقتها إنه هدم فيك حاجه ما بتتبنيش لكن الحقيقة إن الروح دايما
أسبق من العقل الروح أعرف بالطريق الروح بتحفظ الوجع زي ما بتحفظ الفرح وبتتعلم من الاتنين وكفاية إنك توصل للحظه الهاديه اللي بتقول لك توقف عن محاربة اللي مش ليك توقف عن طرق أبواب مقفوله توقف عن محاولة تفسير ليه اللي اتغير اتغير وليه اللي اختفى اختفى لأن في حاجات ربنا بيشيلها عنك قبل ما تكسر نفسك بإيديك وتعرف إن العلاقات مش بعدد الناس اللي حواليك
لكنها بجودة اللي في قلبك وإن الراحة مش مجموع اللي بيحاولوا يثبتولك إنهم موجودين لكن مجموع الحاجات اللي أنت بطلت تعاتبها وبطلت تفكر فيها علشان تتصالح مع نفسك وتعيش من غير ضوضاء ومع الأيام تفهم إنك مش محتاج تبقى كامل ولا محتاج تبقى الأقوى كل اللي محتاجه تبقى صادق مع روحك واعرف قيمتك وماتقيسهاش بكلمة ولا نظرة ولا غياب ولا حتى وعد اتكسر
لأن اللي يقدر قيمتك مش هيخليك تشك فيها لحظه هتعرف إنك مش لازم تكمل مع اللي وجوده تعب ومع اللي حضوره مؤلم ومع اللي كلامه بيوجع أكتر ما بيطبطب وهتفهم إن الانسحاب أوقات مش هروب الانسحاب حكمة والصمت مش ضعف الصمت قوة لما تكون حافظ قيمتك ولما تبص حواليك من بعد النضوج ده هتكتشف إن أجمل راحة في الدنيا هي راحة النفس مع نفسها لما
توقف لوم وتوقف مطاردة ذكريات وتوقف محاولات إصلاح حاجات أدركت إنها اتكسرت من الأول وإن مافيش داعي ترجع لها
ومهما مريت بطرق صعبة ومهما وقعت واتكسرت وكل مره قلت مش هقدر أقوم بتتفاجئ إنك رجعت واقف ورافع راسك كإن الوجع كان معلم ومع كل مرة بتتعلم إن الطريق مهما لف ورجع هيرجعك لنفسك تكتشف إن الحياة مش محتاجة ناس كتير الحياة محتاجة
ناس صح وإن السعادة مش محتاجة مشاهد كبيرة السعادة محتاجة راحة وإن الحب مش محتاج إثبات الحب محتاج صدق وإن الطريق مش محتاج الطريق محتاج نور وفي اللحظة دي بس تعرف إنك رجعت لنفسك رجوع كامل رجوع من غير كسور متخبيه رجوع من غير نزيف قديم لسه بيسحب منك طاقتك رجوع بروح جديدة واعية فاهمة حدودها وعارفة قيمتها واللي جاي دايما أجمل لما الطريق يرجعك لنفسك من جديد
حين يعيدك الطريق إلى نفسك
