حين يصبح الصمت أقدم صديق للإنسان
بقلم/نشأت البسيوني
في لحظة معينه في العمر تلاقي نفسك بتكتشف إن الصمت ما بقاش هروب ولا ضعف ولا مسافة بينك وبين الناس الصمت بقى بيت بتسكن فيه لما الدنيا تعلى عليك وتضغط على صدرك الصمت بقى حضن رغم إنه من غير إيدين وصديق رغم إنه من غير صوت وملجأ رغم إنك ما بنيتوش بإيدك لكنه اتبنى من كتر اللي عدى عليك وتلاقي نفسك كل يوم بتبعد خطوة خطوة عن العالم وعن
دوشة الكلام وعن الوعود اللي ما اتحققتش وعن الناس اللي كانت حواليك وقدرت في ثانية تمشي وتسيب سكاتك يصرخ من جواك من غير ما حد ياخد باله وتبدأ تفهم إن الصمت مش بيعلمك القوة بس لا بيعلمك الحكمة بيعلمك تشوف اللي ما كنتش شايفه وتسمع اللي ما كانش مسموع وتحس اللي ما كنتش جرؤت تواجهه في الصمت تكتشف إنك كنت بتدي فوق طاقتك وإن اللي قدامك ما
فهمش وإن في ناس بتحب الوجود مش الشخص بتحب دورك في حياتها مش مكانتك بتحب الفايده مش قلبك وتلاقي نفسك واقف في نص الطريق ماسك حزنك بإيدك وبتحاول تخبي بيه نقط ضعفك لأنك عرفت متأخر إن مش كل حد يستحق يعرف وجعك ولا يشوف دمعتك ولا يسمع كلمه من اللي بتكسر جواك وتلاقي الصمت بقى لغتك الجديده اللغه اللي ما فيهاش شرح ولا دفاع ولا
تبرير لأنك جربت تتكلم وتوجعت وجربت تشرح واتاخدت على قد عقلك وجربت تدافع وطلع اللي قدامك مش عايز يفهمك أصلاً وتفضل واقف مع نفسك تواجه الحقيقه إنك كنت بتخسر نفسك كل ما تحاول تكسب حد ما يستاهلش وتبدأ تسأل نفسك كام مره كتمت الكلام علشان ما تجرحش حد وكام مره ضحيت بصوتك علشان تحافظ على سلام حد وكام مره كلت القهر وابتسمت علشان
ما تبانش ضعيف وكام مره مشيت من مكان وانت مفجوع جواك بس سايب ضهرك مستقيم علشان ما حدش يحس اللي حصل فيك
ومع كل ده تلاقي نفسك بتتعلم نوع جديد من السلام السلام اللي مش جاي من الدنيا جاي من تقبل إنك مش مضطر تفسر ولا تبرر ولا تقنع ولا تشرح جاي من الإيمان إن اللي يستحقك هيسمع سكوتك قبل كلامك وهيفهم وجعك من نظرة وهيلم شتاتك من
غيرما تطلب وفي قلب الصمت تكتشف إنك كنت مستني نفسك مستني اللحظة اللي تهدى فيها وتعرف إنك أقوى من اللي فاتو عليك وأكبر من اللي كسروا فيك وأصدق من اللي شكوا فيك وتبدأ تحب الصوت اللي جواك اللي كان مخنوق زمان وتبدأ تفهم إنك عمرك ما كنت محتاج جمهور علشان تتشاف ولا ناس علشان تتقدر ولا كلام علشان تثبت اللي جواك وتعرف إن الصمت مش بس أقدم
صديق ليك ده أصدق صديق لأنه ما خانكش ولا باعك ولا خدعك ولا ضحك عليك بالعكس كان كل ما وجعك يعلى يوسع لك مكان جواه وكل ما صدمه تكسرك يطبطب عليك بطريقة غريبه من غير كلام وكل ما تعبك يقرب يدورك على حتة هدوء تستخبى فيها لحد ما ترجع لنفسك وفي الآخر تدرك إنك ما كنتش بتهرب بالعكس كنت بترجع كانت روحك بتحاول تلم نفسها كانت بتحمي اللي فاضل
منها كانت بتتعلم إن مش كل معركه تستاهل تخوضها ومش كل حد يستاهل تحكيله ومش كل وجع يستاهل يبان ومش كل سكات ضعف ساعات السكات احترام لنفسك ومهما الناس قالت إن الصمت وجع وانتفاضة داخليه أنت الوحيد اللي تعرف إنه نجاتك وإنه ملجأك وإنه يمكن يكون الشيء الوحيد اللي فضلك وسط كل اللي اتاخد منك
حين يصبح الصمت أقدم صديق للانسان
