حرس القلب
بقلم/نشأت البسيوني
في لحظه غريبه من عمرك بتحس إن قلبك بقى محتاج حارس مش علشان الناس وحشه لكن علشان التعب خلاه ضعيف يتأثر بسرعه وينجرح بسرعه ويتعلق بسرعه ويفوق متأخر تزيد جواه الندمه وكل ما يحاول يقفل باب يتفتحله باب تاني من غير ما يكون مستعد له وتحس إن روحك بقت واقفه على سطرين سطر فيه خوف وسطر فيه أمل وتفضل عايش ما بين الاتنين مش عارف
تميل لمين ومش قادر تسيب أي حد من غير ما تحس إنك بتخسر حاجه مهمه وفي الآخر تكتشف إنك انت اللي محتاجك قبل أي حد انت اللي محتاج تحمي قلبك من طيبتك من اندفاعك من لحظات ضعفك اللي بتتكلم بصوت أعلى من عقلك وتاخدك لطريق انت ما تستاهلوش وتندم بعدها انك مشيت فيه من الأساس وتبدأ تبص على حياتك تلاقي نفسك استهلكت وقتك في محاوله ترميم ناس
ما كانتش اصلا ناويه تتصلح وديت من روحك لناس كانت شايفه عطائك حق مكتوب مش كرم منك وسكت كتير عن وجع كان لازم يتقال كتير وتنازلت عن حاجات كانت تستاهل تتمسك بيها وعلقت نفسك بوعود ما كانتش صادقه ولا حتى كانت تستاهل صبرك عليها وتفاجأ إنك كنت شايف كل حاجه بس كنت بتكذب على نفسك وتقول يمكن يتغير يمكن تتحسن يمكن الخير اللي جواهم يغلب
الشر اللي طالع منهم لحد ما تفوق وتقول كفايه حماية لقلب غير قلبي وكفايه خوف على وجع غير وجعي وكفايه منح فرص لناس خلصوا من جواي قبل حتى ما أمشي من حياتهم وتعرف إنك محتاج حرس للقلب مش علشان تبقى قاسي ولا علشان تبقى بعيد لكن علشان اللي اتألم كتير بقى لازم يتصان واللي اتجرح كتير بقى لازم يرتاح واللي اتهان بطيبه قلبه لازم يحترم نفسه قبل أي حد
وتبدأ تحس إنك بتتعافى من غير ما تحس إنك بتتعافى بتبقى أهدى بتبقى أعمق بتبقى فاهم أكتر ومحتاج أقل وكأنك بتسترد روحك من تاني بتسترد احترامك لنفسك بتسترد صبرك من أماكن ما كانتش تستاهله وتلاقيك بتقفل أبواب محروق عليها زمان لكن دلوقتي قفلتها من غير دمعة ولا ندم وتقول لنفسك أنا مش محتاج حد يدخل حياتي ويكملني أنا كامل من غير إضافات أنا ناقص بس
راحه ناقص هدوء ناقص احترام حقيقي مش كلام متزوق ومش وعود بتموت قبل ما تتولد وتقف قدام المرايه وتشوف نفسك زي ما عمرك ما شفتها قبل كده تشوف إنك كنت قوي طول الوقت من غير ما تاخد بالك وتشوف إن اللي وقعك قبل كده مش سقوط كان درس وإن اللي وجعك قبل كده مش نهاية كان بدايه وإن اللي اتقفل في وشك مش خساره كان ستر من حاجه كانت هتكسرك
أكتر وتبدأ تقول أنا هحرس قلبي بإيدي مش هسيبه عرضه للكسر مش هسيبه أمان في يد حد مش قد الأمان مش هسيبه يحب غلط ويتعلق غلط ويوجع نفسه غلط هسيبه يعيش صح ويدور على اللي يستاهله واللي يعرف قيمته واللي يفهم إن القلب مش لعبه وإن الروح مش محطة مؤقته وتعرف إن أقوى نسخه منك هي النسخه اللي رجعت لقلبها سلطتها النسخه اللي بقت فاهمه قيمتها النسخه
اللي حطت روحها فوق أي علاقه النسخه اللي بقت عارفه إن الحياه مش انتظار حد يفهمك الحياه إنك تفهم نفسك الأول وتحميها الأول وتحبها الأول ولما تعمل ده هتلاقي كل حاجه جايه لك من غير سعي ومن غير لهفه ومن غير ما تنحني لأي وجع تاني لأنك خلاص بقيت حرس القلب اللي ما يكسرش نفسه وما يسلِّمش مفاتيحه لأي حد تاني
حرس القلب
