انبثاق الكلمات من قلب لا يهدأ
بقلم/نشأت البسيوني
في لحظات معينه من العمر بتحس ان الكلام مش بيطلع من دماغك لكن بيطلع من حته جوا قلبك يمكن كانت ساكته من زمان يمكن كانت مستنيه لحظه تفتح فيها باب الوجع وتخلي الحروف تهرب زي ما هي من غير نقط من غير فواصل من غير تجميل لان اللي خارج من القلب عمره ما بيحتاج تزيين اللي خارج من القلب بيطلع زي ما هو خام صافي كأنه لسه مولود في الدنيا دي ومش شايف
غير الضوء اللي جاي ناحيته ولما تيجي تكتب وانت حاسس بالاختناق بتلاقي ان الورق بيبقى هو الصدر اللي بيتسع ليك وان السطور بتبقى هي الطرق اللي بتمشي عليها وانت مش عارف نهايتها فين لكنك مصمم تكمل لان الهروب مش اختيار ولان الكلام اللي اتبلعته سنين جه معاده انه يخرج يمكن علشان ترتاح يمكن علشان تفتكر انك لسه قادر تواجه الدنيا بقلمك حتى لو انكسر حتى
لو اتهز قدام اول جمله كتبتها يمكن علشان تعرف ان اللي حصلك ما كانش عبث وان اللي اتسرق منك ما ضاعش كله وان اللي وجعك سيب علامه فيك بس العلامه دي بقت جزء من قوه مش جزء من ضعف ومع كل حرف بتكتبه بتحس انك بتفهم نفسك اكتر وبتعرف ازاي تتعامل مع الخيبات اللي كانت بتقع عليك مرة واحده زي المطر الثقيل اللي بيضرب الزجاج في عز العاصفه وما كنتش فاهم ليه
الدنيا بتقسو للدرجه دي بس دلوقتي بتشوف تفاصيل مكنتش بتشوفها زمان بتشوف انك نضجت من كتر اللي شوفته وانك بقيت تفهم الوجوه وتعرف مين اللي بيحبك ومين اللي بيتمنى زلتك ومين اللي موجود بس لما يكون محتاج حاجه ومين اللي موجود علشان انت انت مش علشان اي حاجه تانيه ومع مرور الوقت بتكتشف انك مهما كنت طيب لازم تحط حدود وان مهما كان قلبك
كبير لازم تخلي جزء منه محفوظ لك انت بس جزء لا يتحاكم ولا يتكسر ولا يتقدم هديه لحد لان اكتر ناس كسروك كانوا ناس صدقت انهم أمانك وطلعت غلط لكن الغلط مش فيك الغلط في اللي مقدروش قيمتك وفي اللي شافوا صدقك ضعف وفي اللي افتكروا انك موجود علشان تتشال الهموم عنهم من غير ما يفكروا لحظه تشيل همك انت كمان وبالرغم من كل دا بتلاقي نفسك في
الآخر واقف واقف رغم الخسارات واقف رغم اللي ضاع واقف رغم اللي وجع لانك مش من النوع اللي بيقع وما يقومش انت من النوع اللي لما يقع يتكسر بس يرجع يبني نفسه من الاول من النوع اللي ملامحه بتتغير بعد كل صدمه بس روحه بتفضل واقفه من النوع اللي بيسيب الزمن يشطب ذكريات معينه بس ما يشطبش قيمته ولا اسمه ولا تاريخه ومع كل يوم بيعدي بتفهم ان الحياه مش
مطلوب منك تنتصر فيها على حد لكن مطلوب تنتصر فيها على نفسك على ضعفك على استسلامك على لحظاتك اللي افتكرت فيها انك انتهيت وكنت ببساطه في بداية مرحله جديده انت اقوى منها ومع كل مره هتفتكر الايام دي هتعرف انك كنت بتتخلق من جديد وان اللي كنت فاكره نهايه كان مجرد باب اتقفل علشان باب تاني يفتح بس المره دي ليك مش عليك وان الحاجات اللي وجعتك
كانت هي نفسها اللي بنت جواك الانسان اللي انت عليه دلوقتي انسان فاهم وواعي وواقف ثابت حتى لو الدنيا من جواه لسه مش مرتبه حتى لو ما زال في وجع ما بينامش حتى لو في ذكريات بتلسعك من وقت للتاني بسكوت الحاجات اللي حصلت لك ما كانش ضعف صمتك ما كانش هروب دموعك ما كانتش انهيار انت كنت بتشيل نفسك من غير ما حد يحس وبتحارب من غير ما تشتكي
وبتسند قلبك بيدك لان مفيش حد كان هيعمل دا مكانك ودا في حد ذاته بطوله محدش يقدر يشوف جمالها غير اللي خاض نفس الطريق نفس الخيبه نفس الوجع ونفس القيامه من وسط الرماد واللي جاي يمكن يكون اصعب ويمكن يكون احلى بس الاكيد انه مش هيكسرك لانك اتكسرت قبل كده واتجمعت ومع كل مره بتقوم بتتعلم ازاي تحمي نفسك وازاي تفهم الناس وازاي تختار الطريق
اللي يناسبك مش اللي يفرضوه عليك وازاي تبقى انت حتى ولو العالم كله بيحاول يغيرك انت اللي هتعيش وانت اللي هتتوجع وانت اللي هتقوم وانت اللي هتكمل ومحدش هيكمل عنك فامشي ورا قلبك حتى لو الطريق طويل حتى لو الأيام مش دايما لطيفه بس امشي وانت رافع راسك ومصدق انك تستحق الاحسن لانك فعلا تستحقه وكل كلمه كتبتها دلوقتي ما كانتش مجرد مقال كانت جزء منك بيحاول يرجع يعيش من جديد
انبثاق الكلمات من قلب لا يهدأ
