الاعلامي سمير الشرنوبي منظومة جديدة للخبز.. إشادة ضرورية
الاعلامي سمير الشرنوبي منظومة جديدة للخبز.. إشادة ضرورية
كتب الإعلامي سمير الشرنوبي
– من أيام أعلنت وزارة التموين عن تجربة جديدة لبيع الخبز البلدي المدعم اللي في المخابز بسعر التكلفة لغير المسجلين في بطاقة التموين.
– منظومة خبز التكلفة دي من المفترض أنه هدفها هو السيطرة على ارتفاع أسعار الخبز السياحي بره بطاقات التموين، وده شيء مهم خاصة أنه أسعار العيش السياحي دلوقتي ما بين جنيه وجنيه ونص في معظم المناطق في مصر.
– المنظومة الجديدة لسه لم تبدأ في التطبيق، غالبا هتبدأ في الأيام الجاية بحسب تصريحات المسئولين، وهنشوف هل هتنجح في ضبط الأسعار أم لا، لكن مجرد التفكير في حلول زي دي هي شيء يستحق الإشادة في ظل الظرف الاقتصادي الحالي واعتماد المصريين على العيش كمصدر مهم للغذاء.
– إيه هي المنظومة الجديدة؟ ليه مهم أنها تدخل نطاق التنفيذ ويتم تعميمها؟
****
إيه هي المنظومة الجديدة؟
– وزارة التموين أعلنت بعض التفاصيل الخاصة بالمنظومة اللي هيبدأ تجربتها على نطاق مخبز أو مخبزين في البداية، ببساطة المنظومة هي أنه هيئة البريد هتوفر كارت مسبق الدفع للحصول على الخبز المدعم.
– الكارت ده هيتم شحنه من خلال الهيئة، وتكلفة إصداره هتبقى في حدود 30 جنيه، ومن خلاله يقدر المواطن يشتري العيش المدعم بتاع الحكومة بس بسعر التكلفة.
– ممكن يتم شحن الكارت بـ 30 و 50 و100 جنيه، وبيدي لحامله رصيد من الأرغفة يشتريها من المخابز البلدية اللي بتشتغل ضمن منظومة التموين واللي عددهم حوالي 30 ألف مخبز.
– سعر الرغيف لم يتحدد بشكل رسمي حتى الآن، لكن تصريحات من مسئولين في الوزارة حوالين المواضيع قالت أنه هيبقى بين 65 و75 قرش للرغيف وده يعني أنه تقريبا بسعر التكلفة.
– مصادر تانية من داخل الوزارة قالت لموقع مدى مصر أنه السعر هيكون في حدود 80-90 قرش، طبعا ده يعني أنه الرغيف الـ90 جرام بتاع التموين اللي هو مش بالضبط زي العيش السياحي حيكون أقل بنسبة 30% عن سعر العيش السياحي المتوسط دلوقتي.
– المنظومة فكرتها جيدة، ومهم أنها تبدأ في العمل وتتعمم في أسرع وقت وخاصة أنه البنية التحتية لصرف الخبز من خلال الكروت الالكترونية موجودة بالفعل في المخابز اللي بتشتغل مع الوزارة.
– وبالتالي هيكون عندنا دلوقتي 3 أنواع من الخبز، وهي الخبز المدعم اللي سعره حوالي 5 قروش وبيستفيد منه حوالي 65 مليون مواطن، ومنظومة تانية بسعر التكلفة للي خارج البطاقات التموينية، وكمان الخبز السياحي اللي في المخابز الخاصة والسياحية.
– ده بيقدم خيارات مختلفة قدام المواطن في ظل الأزمة الحالية، وممكن المنظومة دي لو نجحت تكون منافس جيد للمخابز وخاصة في أوقات الأزمات وزيادة أسعار القمح المستورد.
****
ليه مهم المنظومة دي تبقي موجودة؟
– بالتأكيد بعد بدء التطبيق ممكن تظهر مشاكل مختلفة في التجربة دي، زي التسرب اللي ممكن يحصل للدقيق المدعم اللي سعر الطن فيه 10 آلاف مقارنة بـ 15 ألف حاليا في السوق.
– ممكن تظهر مشاكل تانية، لكن ممكن التقليل من سلبيات المشاكل دي مع الوقت، بل وحلها على المدى الطويل.
– التجربة دي مهمة لأنه في الوقت اللي حصل في انخفاض حوالي 50% في سعر الصرف خلال الشهور اللي فاتت زاد متوسط سعر الرغيف بحوالي 50% برضه، وده بيخلي الناس تبقي أقل قدرة على شراء العيش، واللي هو بالأساس بيلجأ لزيادة استهلاكه المصريين في وقت الأزمات الاقتصادية، لأنه أرخص حاجة ممكن تشبع بالبلدي يعني.
– طبعا زيادة استهلاك العيش ليها آثار صحية سيئة مقارنة باستهلاك أشياء زي الخضروات مثلا، لكنه بيقدم قدر جيد من السعرات الحرارية في بلد فقير زي مصر.
– وبالتالي التجربة دي لو نجحت ممكن يتم تعميمها في سلع أخرى، تصرف على البطاقات الذكية دي من خلال المنافذ الاستهلاكية التابعة للحكومة وتكون بسعر التكلفة برضه أو بهامش ربح بسيط.
– ده بيوفر للمواطن العادي خيارات للاستهلاك وبالذات في الأوقات اللي فيها تضخم كبير، وممكن تبقي بديل كويس عن فكرة الشوادر وعربيات القوات المسلحة وغيرها واللي هي كلها منظومات مش بتوصل لكل الناس في مصر وفيها هامش كبير بالمناسبة من الفساد.
– نتمنى طبعا أنه تطبيق منظومة خبز التكلفة دي متكونش مقدمة لرفع الدعم عن الخبز وإخراج المزيد من الأسر من المنظومة خلال الفترة الجاية بدعوى أنهم مثلا بيشتروا خبز التكلفة.
– نتمنى كمان إنها تكون محاولة حقيقية لتخفيف الضغط عن المواطنين في أوقات الأزمات الاقتصادية واللي بتأثر على مستوى معيشة كثير من المصريين.
الاعلامي سمير الشرنوبي منظومة جديدة للخبز.. إشادة ضرورية
