امتي بنختار الإنسحاب؟ ونقدر نكتب جملة النهاية ؟
امتي بنختار الإنسحاب؟ ونقدر نكتب جملة النهاية ؟
كتبت /مرفت عبد القادر
امتي بنختار الإنسحاب؟ ونقدر نكتب جملة النهاية ؟
كنت بستغرب ليه الناس بتفارق بعد العشرة والسنين والحب..
امتي الصبر بينفذ والنفس بتطلب الخلاص؟
امتي مبنقدرش نغفر ونسامح؟
صدقت مقولة زمان مراية الحب عامية، بتلغي العقل وبصيرته ونوره…
طب امتي العقل بيسيطر تاني ونوره يرجع ويقدر يستوعب اني قلبه حدفه في دوامة الخداع؟
ياترى هو جه في يوم وليلة وضربت في دماغه انا لازم ابعد؟ لازم اتخلي!
ولا سنين ومواقف كان بيجدف علشان يطلع من دوامة التيه اللي قلبه رميه فيها؟؟
ايه اللي يوصلنا نرجع اغراب؟
ايه اللي يهدم الود؟ ويبني الحواجز ويكبر الفجوة؟
الحقيقة إني القلب صبر، والعقل تعب من علاقات ومواقف كتير ماينفعش كان يعديها ويفوتها…
حاجات وجعتنا ووجعت غيرنا اخدنا بالنا منها الف مرة وبرضه بنكررها في حق بعض..
اللي هو من آمن العقاب أساء الأدب🥺
العلاقات اللي فيها قلة قيمة ، وكسر خاطر وعشم مش في مكانه..
الحب اللي اخترناه غلط لشكل او لمنصب او لعشرة ..
الكدب والتمثيل لمجرد إننا نبان ولاد اصول.. الحب والكدب مبيجتمعوش…
فقدان الثقة وضياع الامان..
الاعذار الكاذبة والوعود الزائفة..
رد المعروف بالإساءة..
التظاهر بالرضا والسعادة المزيفين، المؤقتين.
ضعفنا وعنادنا وخوفنا من الشماته وكلام الناس ….
الصحوبية المزيفة اللي بتنتهي لما المصالح تنتهي، أو حد جديد يدخل حياتنا.
لما مصالحنا تتعارض مع بعض ونتنافس علي الدنيا…
مش دايما الصبر بيوصلنا للسلام النفسي اكتر من مابيوصلنا للتعب النفسي يأذينا ويأذى غيرنا…
كل ده هنكتشفه لما الحقيقة توضح والعقل يرجع له بصيرته
وقتها هتتلاشي العشرة والسنين مع المواقف والصعوبات وساعتها بنقدر نقول THE END🥀
.
