دكتور عبدالله أحمد يجيب كيف تبني علاقة عاطفية صحية ؟
متابعة نشوى شطا
الحاجة اللي بندور عليها في أي علاقة في حياتنا هي إننا نكون متشافين، مسموعين، متقدرين .. الحاجات البسيطة دي هي اللي بتدينا إحساس إننا في علاقة صحية تستاهل وقتنا وتستاهل إننا نكمل فيها.
وبسؤال دكتور عبدالله أحمد استشاري العلاقات الزوجية والأسرية ازاي نقدر نبني علاقة عاطفية صحية ؟
يجيب : 3 حاجات تقدر تعملها عشان تبني علاقات صحية عاطفية:
– التقدير: فكرة إنك تقدر حد لشخصه مش عشان الحاجة اللي بيعملها، فمثلا تقوله:
“أنا بحب حماسك وأنت بتعمل الحاجة اللي بتحبها” أو “أنت طيب أوي في تعاملاتك مع الناس اللي حواليك، وأنا بحب أشوف ده فيك”
– الفضول: الفضول في مشاعر اللي قدامك وصحته النفسية، فمثلا تقوله:
“بتفكر في ايه دلوقتي؟” أو “أنا موجود لو حبيت تتكلم في أي وقت”
– التواصل البسيط: ده بيكون من خلال حاجات بسيطة بتعملوها سوا، زي مثلا تقضية وقت مع بعض في الطبيعة أو إنكم تجربوا مطعم جديد سوا.
ويضيف دكتور عبدالله أحمد الحاجات البسيطة دي هي اللي بتقوي العلاقات وبتخليها صحية أكتر وتبين حقيقتها.
لو حاسس إن علاقتك العاطفية غير صحية ومأثرة بالسلب عليك، محتاج تفكر ايه اللي ناقصك فيها وايه اللي ممكن الطرف التاني يقدمهولك وإزاي تقدر توصله احتياجك ده.
ويكمل حديثه قائلاً كتير مننا كبرنا في بيئة كانت احتياجاتنا العاطفية مش مهمة بالنسبة للناس اللي حوالينا، وده خلانا حتى مش عارفين ايه هي الاحتياجات دي ولا عارفين إننا لازم نعرف إزاي نتواصل مع شريك حياتنا عشان يقدر يعرف ايه هي احتياجاتنا في العلاقة ويحاول يلبيها.
لازم كمان نكون عارفين إن طبيعي جدًا إن الاحتياجات تكون مختلفة من شخص للتاني وطبيعي جدًا إن مفيش شريك هيقدر يلبيها كلها زي ما أنت كمان مش هتقدر تعمل كده.
عشان كده، مهم جدًا إنك تقضي وقت عشان تتعرف أكتر على احتياجاتك واحتياجات شريك حياتك عشان ناس كتير بتعمل الغلطة إنها بتكون فاكرة إن احتياجات كل الناس زي بعض.
أمثلة بسيطة عن اختلاف الاحتياجات بينك وبين شريكك:
احتياجك: لما بتخلص شغل بتكون عايز تتواصل مع الآخرين.
احتياج شريك حياتك: لما بيخلص شغل بيكون محتاج مكان هادئ في البيت يرتاح فيه.
احتياجك: لما بتكون متوتر بتكون محتاج من شريكك إنه يسمعك بس.
احتياج شريك حياتك: لما بيكون متوتر بيكون محتاج لنصيحة أو حل للمشكلة.
العلاقات بتكون غير صحية لما مش بنتواصل مع شريك حياتنا عن احتياجاتنا في العلاقة أو لما بنكون متوقعين إن احتياجاتنا واحد، ولكن التواصل والتفاهم وبناء أرض مشتركة بيساعدك تقوي علاقتك بطريقة صحية ومتفاهمة.
وبسؤال استشاري العلاقات الزوجية والأسرية..ازاي نعبر عن احتياجاتنا بالطريقة الصح ؟!!
يجيب دكتور عبدالله أحمد أن هناك 3 حاجات لازم نكون دايمًا فاكرينها واحنا بنعبر عن احتياجاتنا:
شريك الحياة مش بيقرأ أفكارنا، بمعنى إنه مش هيعرف أنت محتاج ايه من غير ما تتواصل بشكل واضح.
مش شرط إن الشريك يقدر يلبي احتياجك اللي طلبتها منه، فلازم يكون عندنا مرونة في إننا نسمع بعض.
التعبير عن احتياجاتنا العاطفية بيكون إحساس غريب خصوصا لو كان بيتم تجاهلها في مرحلة الطفولة، بس لما تتعود تعبر عن نفسك وتطلب اللي أنت محتاجه من شريكك الموضوع بيكون أسهل مع الوقت.
يكمل حديثه بعد ما تحط الحاجات البسيطة دي في دماغك، تعالى أقولك على 3 أمثلة عن إزاي تعبر عن احتياجاتك العاطفية بكل سهولة:
“أوقات كتير بحتاج أتكلم من غير ما أسمع نصائح عن المفروض أعمل ايه .. ممكن تحاول تعمل كده؟ لإن ده بيديني الإحساس إنك بتدعمني”.
“أنا بحس إني مش مرتاحة لما بتشارك تفاصيل حياتنا مع أهلك وأصحابك وبفضل إن حاجات كتير في علاقتنا تفضل ما بينا .. ممكن نحط حدود للناس اللي حوالينا؟”
“أوقات كتير بتضايق من الطريقة اللي بتهزر بيها معايا .. أنا عارفة إنك مش عارف ده بس محتاجة إنك تفهم مشاعري”.
ويختتم دكتور عبدالله أحمد حديثه أن التعبير عن الاحتياجات العاطفية مش حاجة سهلة، بس مع الممارسة بنتعود إننا نعمل كده واحنا مرتاحين وده بيسهل العلاقات وبيقويها، وماتنساش تشجع شريكك دايمًا إنه هو كمان يعبر عن احتياجاته وتسمع له من غير ما تقاطعه ، ولو مش عارف تحسن علاقتك وتوصل احتياجك للشخص اللي قدامك ، ممكن تزور حد متخصص يساعدك إزاي تفكر وتتصرف بشكل أحسن مع شريك حياتك.
