لو كل الأفكار اللي بتيجي فجأة ع البال ليها مفتاح نرجعها 
لو كل الكلام اللي بيطرأ أمام العين ثم يتلاشى ينفع له استدعاء كانت تبقى أجمل حاجة
بس ياخسارة الواحد يبقى بين اليقظة والمنام تجي له فكرة قصة ويعيش أحداثها فعلا ويرسم شخصياتها بدقة ويختار كمان عنوانها
ثم فجأة ينام يصبح الصبح يلاقي الموضوع طار في الهوا أو ذهب مع الريح
ويفضل اللوم والتأنيب والتوبيخ والتقريع ملازم للإنسان فترة ليست بالقصيرة
قلت أجيب ورق وقلم وأخليه جنبي لما تيجي الفكرة بالسلامة أمسكها وأثبتها على شريط الحالة لحد ما أكتب العنوان وبعد كده أطلق سراحها
لو جبت القلم أنسى الورق ولو جبت الورق أنسى القلم
وتيجي فكرة تطرد فكرة ويحصل بينهم معركة داخل فص المخ الوسطاني كان مفروض أزحزحها شوية لقدام تفاجأ بالصلع يزحف في منتصف الرأس فتتزحلق الأفكار
وده فكرني براجل كان نايم جاله شخص ف المنام بيعطيه مبلغ قال له كام دول قال له ٩٩ دينار أودرهم أوريال أوجنيه بس مش دولار ولا يورو لأن الأجانب عمرهم ماهايوصلوا للعبقرية بتاعتنا
المهم قال له ٩٩ جنيه
قال له لا مش هاخدهم مش هقبل أقل من ١٠٠
فضل يتحايل عليه ياخد ال ٩٩ رفض بإصرار
فجأة صحي من النوم ما وجد شيئا
جه رامي نفسه وعمل أنه نايم
ونادى عليه قال له ياعم هات ال ٩٩ أنا كنت غلطان لو كل الأفكار اللي بتيجي فجأة ع البال ليها مفتاح نرجعها
طه هيكل
