صــــوت الســواقي بقلمي خون أنوب الجديد معوض حلمي لمـا غيـابك طــال ، إشتـقت لعنيــكي طلعت أشكي الحال ، والشوق يناديكي بصيت ف عين الورد يام العيون وساع مالقيتش فيها متاع ولاصوت غناويكي صوت السواقي حزين وبيشتكي اللبلاب قلبـك حـنانه فـين ، يامقـفله الأبواب معادش فيكي وفـا ، ولاعاد خبيز الفرن ولا لمه وسط الجورن بتجمع الأحباب كنا زمان عايشين ، الود كان موصول دلوقتي شوفنا البين ف لمة المحصول جار البصل ع التين ، والدين صبح عله السوق مالوش مله ، ولا بيلتزم بأصول قالوا عليكي زمـان ، للحـرانين ضــله بتوهــــبي الرمــان ، وتـوزعي الغـــله ليه لما مات يوسف بتنادي عايزه العـطا وليه جدارك وطى ، وبتشـتكي العـله كهنـة آمـون دايرين ، الدنيـا عمـيـاهـم والفلاحـين خايفين ، اللقـمـه شغــلاهم طيبه الجديده صواري ، بترفع العلمـين مفتـوحه للفـراعين ، والعـامـه نفياهم عجب العجب فيكي يامقطعه الصفصاف آخر سـؤال ليكي ، ياحــلوة الأوصـاف هياها نفس الأرض ، والسنبلات طارحه ليه السنين كالحه ، وليه الأماني عجاف صــــوت الســواقي
