رعشة جفون
بقلم الشاعر : أحمد إبراهيم النجار
مالهاش جواب شد الغطى
وإرجع ونام نزل الستار
أحلام فى عين متشعبطة
والليل طويل
أحلام كتير متلغبطة
كوابيس وويل مسرح كبير
عفَاريت عليه متنطّطه
والرقص فن والطبل فن
والعشق فن المُغرمين
والدنيا فيها زروتة
مالهاش جواب
إرجع ونام شد الغطى
كل الليالي شبيها بعض
مالهاش فصول
غير فصل برد
واحد شتا رعد ومطر
برق وخطر
حارق بواقي أبراج حمام
حطام بواقي م السنين
فيها العِجاف رغم المطر
فيه الجفاف
وده شئ غريب
حلم ف منام
مالهوش ملامح من سنين
كم ألف ليل
ساكن جبين
والعرق نازل بحار
رعشة جسد جوه الغطى
وكبوس مرير والليل طويل
لعمرى بشعُر بالدفى
أجواء فى حلمي ملغبطه
عقرب ساعات واقف وفيه
عقرب ثواني بطول ساعات
ساكن فى قلبي كتير أهات
ولا حتى مسموح بالأهات
شايف ضباع ومنقطة
حلمي فظيع مالهوش مثيل
كل الليالي صراع وخوف
أفكار فى مخي مشتّتة
ورعشة فيا م الشتا
أصبحت بين أحلام كتير
بين الرماد والسواد متلوّنة
بصرخ أنا
فى صمتى وف حلمي الطويل
وأنده عليكِ ماتسمعي
حِطام بواقي صرختي
نزلت بحور
من عيوني دمعتي
عايش أنا ما بين كابوس
مِصحبني فى وحدتي
ليه تبعدي بتغربي وبتهربي ؟
شمس الغروب
على طرحتك متغربة
بصرخ أنا
ولا يوم سمعتي صرختي
شدي الغطى أوضاع كتير
فيكِ حبيبتي ملغبطة
مالهاش جواب
وأنا ليلي عايش ع المدى
ساكن سنين برد الشتا
وانا لسه شادد الغطى
بقلم الشاعر المصري أحمد إبراهيم النجار
