الصوت اللي محدش بيسمعه
بقلم/نشأت البسيوني
في جوا كل واحد فينا صوت صغير جدا صوت مش باين وسط دوشة الحياة ولا وسط كلام الناس ولا وسط الخطوات السريعة ولا حتى وسط صمت الليل الطويل صوت ما بيعلاش وما بيصرخش صوت بيكتفي إنه يهمس جواك من غير ما تطلب منه حاجة ومن غير ما يطلب هو إنك تسمعه الصوت ده أوقات يحذرك من طريق مش ليك أوقات يشدك ناحية أمل كنت فاكره مات وأوقات يرجعك
من على حافة قرار كنت هتندم عليه العمر كله وأوقات يقف جنبك في لحظة ضعف محدش يعرف عنها حاجة غيرك لكن الغريب إن أغلبنا بيعدي حياته كلها من غير ما يدون لحظة واحدة يسمع فيها الصوت ده لأننا دايما مشغولين دايما عايزين نرضي حد دايما خايفين نواجه نفسنا دايما بنكتم الحقيقة في قلوبنا ونمشي ندور على رضا الدنيا اللي عمرها ما رضيت حد ومع الزمن تكتشف إن
أصعب حاجة في الحياة مش إنك تسمع الناس أصعب حاجة إنك تسمع نفسك لأن صوتك الحقيقي مفيهوش تبرير مفيهوش كذب مفيهوش مجاملة مفيهوش ما يصحش صوتك الحقيقي صريح صراحة ممكن تهزك وتقلبك وتغير حياتك الصوت ده يقولك توقف لما أنت مكمل غصب صوت يقولك كفاية تنازل لما أنت فاكر إنك بتعمل الصح صوت يقولك سيب اللي بيقلل منك حتى لو بتحبه
صوت يقولك امشي من مكان بيمس كرامتك حتى لو كنت متعلق بيه صوت يقولك ارجع لحلم كنت سايبه في آخر درج النسيان صوت يقولك إنك تستاهل أحسن من اللي أنت رضيت بيه ومع كل همسة منه تفهم إن الحياة مش سباق وإن السرعة مش فوز وإن أقرب طريق لنفسك هو أبطأ خطوة تجاه الحقيقة وإنك لو فضلت تسمع كل الناس مش هتعرف تسمع أهم صوت في الدنيا صوتك
وفي لحظة ما تكونش مخطط لها تيجي الهمسة اللي تغير كل حاجة الهمسة اللي تقولك إنك قوي رغم تعبك وإنك واقف رغم كسرك وإنك فاهم رغم إنك ساكت وإنك قادر رغم كل اللي اتاخد منك وتلاقي روحك لأول مرة من زمان بتتنفس بعمق كأنها بتستقبل حياة جديدة وساعتها بس تفهم إن الصوت اللي محدش بيسمعه
كان طول الوقت مستنيك تسكت الدنيا شوية وتسمعه علشان تعرف إنك ما كنتش تايه أنت بس كنت بعيد عن نفسك
الصوت اللي محدش بيسمعه
