خطوة خارج الزحمة
بقلم/نشأت البسيوني
في وقت معين الإنسان يحس إن الدنيا بقت زحمة أكتر من اللازم زحمة في الأصوات زحمة في الناس زحمة في التفاصيل اللي بتجري من غير ما تستنى حد زحمة تخليك مش قادر تميز صوتك من صوت العالم وتخليك تايه بين اللي لازم تعمله واللي انت عايز تعمله وبين اللي الناس متوقعاه منك وبين اللي قلبك بيطلبه وفي وسط الزحمة دي ييجي يوم معين يوم مش شبه غيره يوم تلاقي
نفسك محتاج تاخد خطوة واحدة بس خطوة تخرجك من الد وتدخلك على نقطة صفاء كده بينك وبين نفسك خطوة تمشيك بعيد عن الضغط والعصبية وعن كل سؤال مش لاقي له إجابة وعن كل علاقة بتشدك لورا بدل ما تدفعك لقدام الخطوة دي مش هروب ومش ضعف بالعكس دي خطوة قوة لأن اللي يعرف يفصل يعرف يعيش واللي يعرف يوقف يعرف يفكر واللي يعرف يقول لأ يعرف
يحمي الجزء اللي جواه من إنه ينهار من غير ما حد ياخد باله
وأول ما تاخد الخطوة دي تحس إن النفس بقى أعمق والهمة بقت أوضح والقلب بدأ يرجع لنبرته الهادية اللي كانت غايبة وسط دوشة الأيام تحس إنك شايف الطريق قدامك من جديد من غير ضباب من غير توقعات من غير حد ماسك فيك ولا حد بيشدك للزاوية اللي مش بتاعتك خطوة خارج الزحمة بتعلمك إنك ما تولدش في
الزحمة أنت اللي اخترت تدخلها وإنك مش مجبور تعيش حياتك كلها تجري وانت مش فاهم بتجري ورا إيه وإن التوازن مش هدية التوازن قرار وراحة البال مش صدفة راحة البال اختيار واستمرارك مش بالمشاكل اللي حواليك استمرارك بالطريقة اللي بتتعامل بيها معاها ولما تبعد شوية تكتشف إنك كنت شايل أكتر من اللازم وإنك كنت بتدي وقتك للي ما يستحقش وإن فيه ناس كان وجودها تقيل
بس انت كنت ساكت وإن فيه تفاصيل صغيرة كانت بتستهلكك وأنت فاكر إنك متماسك خطوة واحدة بس ممكن تغيّر نظرتك للحياة مش خطوة سفر ولا خطوة صراخ خطوة هدوء خطوة رجوع لنفسك خطوة تقول فيها أنا أهم من الزحمة أنا اللي أختار مين يدخل ومين يخرج ومين يفضل ومين يمشي كل اللي محتاجه إنك توقف وتتنفس وتقرر إن حياتك مش ممر حد يعدي فيه حياتك مساحة ليك انت اللي ترسمها وانت اللي تنظفها وانت اللي تقفل بابها أو تفتحه
خطوة خارج الزحمة
