بيت زينب
بقلم الأديبة / نيفين الطويل
كان ف خاطرى ابنيلها بيت
بيت كبير
لونه ابيض
ويساعِينا
مَره قُلتلها الحكايه
وانتى رأيك ايه يا زينب؟؟
طلبت انه يكون
بَ زِينه
وبجَنَينَه
خُضرته تضلل علينا
واِن أختى تعيش معانا
والعيال يملوه( صداع)
بَس ماتقوليليش هاسافر
شُغل
وابصر إيه
وبتاع
كُنت لسه بنت سِته
وكنت حلوه
وكُنت شاطره
وكنت عاشقه
كل تفصيلة ف ملامح زوزو
وأسال نفسي ليه؟؟
يومها قلت انا هاوفى وعدى
جمعه بس وهاتشوفيه
كنت بحلم بِيه
بَلُونُه
ورد ع الجدران يِزِينُه
فيض حنين يهزم سنينه
لما يجرى العمر بيه
كل ما أكبر
بيتناجوه عيونى يصغر
حُضنى جوه براحها يصغر
هيه تكبر
حِملى يكبر
لما مشيت
خُفت احلم
كل حلم ف خاطرى ضاع
كل يوم نفس الصراع
بس مش نفس( الصداع )
بصحى كل يوم وباسأل
نفسي يوووووووووه
لسه فاضل قد ايه؟
ليه ماتبتش ف شالها
وقت لحظات الوداع
شلت ايه طب من جمالها
اشرب الاحزان عليه
سِبته ليه؟
وقت اما شالها
واكتفيت بالاستماع
بالضياع
ياما لمامشيتى قبلي
بيتنا ضاع
ليه ماصَرَختِش سِيبُوها
أمى مابتعرفش تسكن
غير ف بيتى اللى فخيالى
يا اما طيب روحى حبه
وهاتى خالى
هاتى أختى
هاتى اخويا ونِستخبى
ما احنا برضه هانبقي كُتره
نغلب الموت باجتماعنا
لسَه عامله نفسي عايشه
وبرضه مش لاقيه لغيابك اى معنى
ماما
بقي بالله عليك
تيجى خايفه الدنيا ضلمه
الدنيا ظالمه
لسه بحلم الاقى بيت
اى بيت
وسط عاطفه
حَاره
إِمه
والعيال يقولوا لى سَبِت
واجرى وألقى ف بيتنا أُمه
يا اما لو مافيهوش ورود
بس نرجع نبقي لمه
نلقي ضمه
حتى لو كان بينا دود
بيت هابيع العمر كله وابقي جنبك واشتريه
لسه بحلم الاقى بيت
اى بيت
بس الاقى امى فيه؟؟؟
