احسب لي عمري
عادل محمود
ميلادي فـ البطاقة مكتوب بالسنين!
لكن فيه سنة مَعشتهاش
و كمان سنه مَكملتهاش
وسنه جريت مَحصلتهاش
وسنة وقفت مَخلصتهاش
وسنة طارت مَلحقتهاش
وسنة عقلي فيها طاش
وسنة راحت مني بلاش
وسنة حظي فيها مَاجاش
والسنة التانية مَعوضتهاش
واربع سنيين مَحسيتهاش
وكمان تلاته مَعدتهاش
وسنة نمت مصحيتهاش
احسب لي عمري
عشان انا محسبتهاش
ماهو فيه سنين عشتها
وفيه سنين ماعشتهاش
وخدها مني نصيحة
ابدا ماتنسهاش
متضيعش عمرك يابني
دا العمر مابيستناش
ولو ضاعت منه سنة
الزمن مابيرجعهاش
احسب لي عمري
