حين تختار نفسك لأول مرة
بقلم/نشأت البسيوني
في لحظة معينة من غير ضجيج ولا إعلان تلاقي نفسك واخد قرار مختلف قرار بسيط في شكله لكنه تقيل في معناه إنك تختار نفسك لأول مرة بعد سنين كنت فيها دايما بتقدم غيرك وبتأجل راحتك وبتسكت علشان ما تزعلش حد وبتتعب علشان تحافظ على حاجات ما كانتش بتحافظ عليك وتحس في البداية إن القرار ده غريب عليك كأنك بتعمل حاجة غلط كأنك بتخون الصورة القديمة
اللي اتعودت عليها لكن مع كل خطوة صغيرة بتاخدها لنفسك تكتشف إنك كنت محتاج ده من زمان وإنك ما كنتش أناني ولا قاسي انت بس كنت ناسي نفسك وسط كل اللي حواليك وتبدأ تلاحظ إنك بتقول لا من غير خوف وبتبعد من غير تبرير وبتقرب من اللي يريحك مش اللي يستنزفك وبتفهم إن وجودك مش واجب على حد وإن طاقتك مش مفتوحة لكل الناس وإن قلبك مش
محطة لأي حد يعدي ويكمل طريقه ومع الاختيار ده تلاقي إن حاجات كتير بتتساقط لوحدها علاقات كانت قائمة على استهلاكك كلام كان عايش على صبرك مواقف كنت بتجبر نفسك عليها كل ده يبدأ يختفي لأنك بطلت تدي نفس الدور وبطلت تكون نفس الشخص اللي بيقبل كل حاجة وتتعلم إن اختيارك لنفسك مش معناه إنك بتخسر الناس لكن معناه إنك بتكسب نفسك وإن اللي
يستحقك هيعرف يفضل من غير ما يطلب منك تتنازل عن راحتك وإن اللي يمشي ما كانش مكانه من البداية وتحس بهدوء مختلف هدوء جاي من إنك أخيرًا بقيت صادق مع نفسك مش بتمثل ولا بتجامل ولا بتحاول ترضي حد على حسابك وده الهدوء اللي بيخليك تمشي واثق حتى لو الطريق مش واضح تكتشف إن أصعب قرار هو أول قرار تختار فيه نفسك لكن بعده كل حاجة بتبقى أسهل
لأنك أخيرا فهمت إنك تستحق تكون الأول في حياتك مش الخيار الأخير
حين تختار نفسك لأول مرة
