حين يستيقظ القلب من صمته
بقلم/نشأت البسيوني
في وقت ما في حياة كل واحد فينا بييجي يوم غريب يوم بتحس فيه انك مش فاهم نفسك ولا فاهم الدنيا حواليك يوم تحس ان الكلام اتسحب منك فجأة والضحكة اختفت والروح بقت واقفة عند حتة مش عايزة تتحرك منها يوم تحس فيه انك ساكن من جوه رغم انك ماشي وبتيجي لحظة معينة تحس انك عايز تصرخ بس مش قادر وعايز تبوح بس مش لاقي حد يسمعك وعايز ترتاح بس
الدماغ مش سايبك والقلب ساعات بيقرر يسكت يسكت غصب عنه من كتر اللي شافه ومن كتر اللي اتحمله وساعتها ما يبقاش ساكت لانه مرتاح يبقى ساكت لانه موجوع ومكسور وشايل فوق طاقته وواقف في نص الطريق مش عارف يرجع ولا عارف يكمل ولا عارف يختار ولا حتى عارف هو عايز ايه ومع مرور اليوم يتبدل السكوت لأسئلة والأسئلة تتحول لحيرة والحيرة تكبر وتكتم صدرك وتخليك
تمشي في الدنيا وانت مش شايف غير أفكارك ومش سامع غير صوتك الداخلي اللي بيقول لك لحد امتى لحد امتى تفضل شايل اللي جواك لحد امتى تفضل بتضحك والروح من جوه باكية لحد امتى تبقى واقف في مكانك مستني حد ييجي ينقذك لكن الأعجب ان القلب مهما طال سكوته بيصحى فجأة من غير ما حد يلمسه ومن غير ما حد يصحيه يصحى كأنه فاهم ان الزمن ما ينتظرش
وان العمر ما يستاهلش كل الوجع اللي اتحملته يصحى كأنه بيقول كفاية كفاية خوف كفاية تنازل كفاية تعلق بناس ما يستحقوش كفاية أنك كنت بتخلي كل اللي حواليك أولويتك وتنسى نفسك
ويبدأ القلب يسترد صوته من جديد يبدأ يقوى يبدأ يغير اتجاهه يبدأ يفهم ان اللي راح ما يرجعش وان اللي اتكسر ممكن يتلم وان اللي اتاخد منك ممكن ربنا يعوضك عنه بأضعاف ويبدأ يشوف الدنيا
من زاوية تانية زاوية فيها نور هادي بيطلع من أبسط الاشياء صوت طفل بيدحك ريحة هواء بعد مطر كلمة طيبة من حد ما تعرفوش موقف بسيط يفكرك ان لسه في خير وساعتها تدرك ان الصمت اللي وجعك كان مرحلة مرحلة ضرورية عشان تبنيك مرحلة ربنا كان بيجهز فيها قلبك لحاجة اكبر واعمق وانضج تدرك انك مش نفس الشخص اللي دخل الوجع انت خرجت اقوى هادئ اكتر ناضج اكتر
وواعي اكتر وتفهم ان اللي جاي مش شبه اللي فات لا في وجعه ولا في فرحته وبعد ما القلب يستيقظ ويتنفس ويتكلم يرجع يعيش يرجع يحب يرجع يثق بس بعقل بوعي بحذر من غير ما ينكسر بسهولة ومن غير ما يتعلق بأي حد تعلق اعمى ويبقى جوهك يقين ان ربنا عمره ما سابك وانه كان بيصلح اللي جواك وانت فاكر انه بيكسر وفي آخر الحكاية تلاقي نفسك واقف قدام الدنيا بنفسك الجديدة بروح مختلفة بقلب فهم طريقه اخيرا قلب اتولد من جديد بعد صمت طويل
