خمسة جيجا ف كيس بقلم/ طه هيكل معارك يومية لاتنقطع مشاحنات مستمرة بين أفراد العائلة بسبب النت واستهلاك الباقة لازم وضع حل لهذا الأمر الباقة لاتكفي أسبوع فلان استهلك أكثر من فلان فلان حمل برنامج مساحته ٣٠ جيجا النت بطيء النت بيقطع مش كفاية الكهربا بس أنت وهو ناموا كفاية خناق يقطع النت وسنينه ياوزير الاتصالات والمعلومات والحاسبات ونظم الجيجات ريحنا م الهم ده افتحوا النت لا محدود كفاية حيلنا بقى مهدود العالم كله مبيحسبهاش احنا اللي بنحسبها بالبايت وبالميجا وبالجيجا عبوها في أكياس وتتوزع بالتساوي ٥ جيجا ف كيس نص جيجا سلف سلفني ٣ جيجات ربنا مايوقعك في ضيقة حبيبي افتح لي الواي فاي بدل ما أصوت وأقول جاي وألم عليك الجروبات واللايكات والكومنتات وتتفضح فضيحة حرامي جزم يوم جمعة ياوزارة النت كفاية بهدلة باقاتكم مفيهاش بركة جيجاتكم مش بتكفي عايزين الباقة مفتوحة وحاسبونا بالتعريفة واوعاك تنسى إن الجيجا مش بتكفي ٣ بوستات والميجا رابطة راسها من كتر الهم والبايت بره اللعبة مطرود من بيته وبايت عند الجيران خمسة جيجا في كيس
