سيبوا حسام حسن يشتغل.. الاستقالة المطلوبة على أي أساس؟
بقلم: وفاء عبد الغفار
في كل مرة يتعثر فيها المنتخب أو حتى يكسب بصعوبة، يطلع نفس الصوت: “حسام حسن لازم يستقيل”
طيب بناءً على إيه؟ على خطأ فني؟ على نتيجة؟ ولا عشان ناس مصدقة تصفي حسابات قديمة؟
. هل أخطأ كروياً؟
الكورة مكسب وخسارة. وحسام حسن لسه ماسك المنتخب من فبراير 2024، وفي فترة قصيرة جداً.
الراجل لعب تصفيات كأس العالم وكأس الأمم، وجرب لاعيبة جديدة، واشتغل بروح “المنتخب فوق الجميع”.
لو هنحاسب، نحاسب بالأرقام والخطط والتشكيل. مش بشعارات “امشِ” بتتردد على السوشيال ميديا بعد كل ماتش.
النقد الفني حق لكل الجمهور. قول رأيك في الخطة، في التغييرات، في الاختيارات. ده اسمه حب للكورة.
إنما المطالبة بالاستقالة كل شوية دي اسمها هدم مش نقد.
اللي يطبق شرع الله مش من حقه”؟
من إمتى تطبيق الشرع بقى تهمة؟
حسام حسن راجل ملتزم، وبيتكلم عن القيم والأخلاق والأسرة. دي حاجة تتحسب له مش عليه.
من حقه يعيش حياته بالطريقة اللي شايفها صح، طالما في إطار القانون. ومن حقنا كجمهور نحكم عليه كـ مدرب منتخب مصر فقط.
هو دلوقتي مش بيدرب الأهلي ولا الزمالك.. هو بيدرب مصر . بيلبس تيشيرت فيه علم مصر.
تصفية حسابات زملكاوية؟
خلينا نكون واضحين. فيه جزء كبير من الهجوم جاي من ناس زملكاوية شايفين إن “حسام” رمز أهلاوي.
والمفروض العكس.. ناس أهلاوية شايفينه كان زملكاوي.
طب وفين مصر في النص؟
أنا مصرية. وبشجع كل أندية مصر. الأهلي والزمالك والإسماعيلي والمصري والاتحاد. بشجع أي حد لابس علم مصر.
ماينفعش نهد مدرب المنتخب عشان خناقة أهلي وزمالك بقالها 100 سنة.
حسام حسن خدم الناديين كلاعب، وخدم مصر كلاعب ومدرب. التاريخ ده لازم يتحترم.
ادوا الراجل فرصة يشتغل. حاسبوه في نهاية التصفيات. حاسبوه بالصعود لكأس العالم.
لكن استقيل دي كلمة سهلة بتتقال على الكيبورد، لكن تبعاتها منتخب بيقع ولاعيبة بتتشتت.
أنا بدافع عن حسام حسن المدرب الوطني مش عن شخص. بدافع عن فكرة إننا نفصل الكورة عن أي حاجة تانية.
ورا المنتخب. ورا الجهاز الفني. واللي عايز يصفي حساباته.. يصفيها بعيد عن تيشيرت مصر ❤️
#ادعم_منتخب_مصر #حسام_حسن #الكورة_للكورة
