كان نفسي ياابا
كان نفسي يا ابا أشبع من
حنان قربك
كان نفسي أهرب من عذابي
أترمي ف حضنك
كان نفسي احس معنى بابا
وانا ماشي جنبك
وتكون مرايتي وطريق حكايتي
واكون كضلك
فتحت عيني على الحياة
قالولي مات وماعاد فاضلك
غير الدموع ويا الآلام
ياصغر سنك
عشت الحياه وقلبي خالي
من الأمان محتاج أضمك
دورت ياما على الأمان
ما اعرفش إنك
كنت الحياة كنت الأمان
ليه سبت إبنك
وسط الحياة محتاج إليك
محتاج يقولك
عن اللي بيه وعن اللي كان
محتاجه منك
كان نفسه يجري من الهموم
يتدارى عندك
بين الهدوم بين الضلوع
لأ جوه قلبك
كان نفسي يا ابا أرتمي
مابين ايديك ابكي وأقولك
إني تعبت من الحياة
ومحتاج ارحلك
وابعد بعيد عن الحياة
اللي ماتسوى حضن منك
موتك د موتي ياللي خيالي
عايش حكايتك
محتاج إليك وتعبت بعدك
أنا مش لاقيك
وانا حته منك
قلبي انفطر محتاج إليك.
محتاج يضمك
كان نفسي ياابا احس بيك
واسمعها منك
كلمة ضنايا وانا أقول ياابويا
أنا كلي ملكك
بقلم الشاعر فهمى محمود حجازى
