لصالح مين

لصالح مين

جيلٍ بيغرق فـ عزّ شبابه

تايه ما بين الموج والدُّنيا

شايل هموم أكبر من سنّه

ومكسور قلبه مـ القسوة دِيّا

لَمّ هدومه فـ عزّ ليله

والخوف ساكن جوّه عيونه

باس إيد أمّه وقال يا أمّي

يمكن ألاقي هناك أمانه

رمى كراسته عالرصيف

واتنازل عن حلم السنين

لا مدرسة حضنته يوم

ولا الزمن حنّ الحنين

غلبه القهر المرّ جدًا

والفقر هدّ فـ الأحلام

شاف النجاة فـ حضن مركب

تايهة وسط بحرٍ ظلام

مين السبب؟ ولصالح مين

مين اللي صادر ضحكتهم

مين اللي علّم طفل صغير

يشيل هموم أكبر منهم

قالو السفر باب النجاة

والبحر أخدهم للعدم

لا شافوا جنّة فـ الغُربة

ولا ارتاحوا من الألم

حطّ الهموم جوّه براءته

وخد البراءة فـ السفر

طفلٍ ولكن شايل الدنيا

فـ قلب موجوع انكسر

يا بحر ليه بتاخد ولادنا

ليه القلوب مالهاش أمان

دول كان نفسهم يعيشوا بس

وسط البشر.. زَيّ البشر كمان

ده جيل كامل كان نفسه

يضحك ويكبر فـ الأمان

لكنّه اتسرق حلم عمره

واتدفن حيّ قبل الأوان.

للكتاب والشاعر

صلاح على قطب زهران

لصالح مين